Россиянинг Ямало-Ненецк автоном округи Тазов тумани Пякяхин конида 8 декабрь, якшанба куни эрталаб соат 6:45 да содир бўлган ёнғин оқибатида 3 нафар Ўзбекистон фуқароси вафот этгани ва яна бир ўзбекистонлик фуқаро куйиб шифохонага жойлаштирилгани ҳақида хабар берилган эди.
Ўзбекистон Ташқи ишлар вазирлигининг хабар беришича, ёнғин оқибатида вафот этган 3 нафар Ўзбекистон фуқаросининг шахсини аниқлаш билан боғлиқ барча процессуал жараёнлар, консуллик-ҳуқуқий масалалар ва зарур ҳужжатларни расмийлаштириш якунланган. Марҳумларнинг жасадларини 24 декабрь, сешанба куни Ўзбекистонга юбориш режалаштирилмоқда.
«Консуллик-ҳуқуқий департаменти марҳумларнинг оила аъзолари ва яқинларига ҳамдардлик изҳор этган ҳамда Россиянинг Урал федерал округи (Курган вилояти, Свердловск вилояти, Тюмен вилояти, Челябинск вилояти, Ханти-Мансийск автоном округи — Югра, Ямал-Ненецк автоном округи) ҳудудида бўлиб турган Ўзбекистон фуқаролари зарур ҳолатларда мамлакатнинг Екатеринбург шаҳридаги бош консулхонасига қуйидаги телефон рақамлари орқали мурожаат қилишлари мумкинлигини эслатиб ўтган: +7 343 276 31 66, +7 343 272 31 33», — дейилади вазирлик хабарида.
Изоҳ (0)