Ўзбекистон ва Қорақалпоғистон халқ артисти Юлдуз Усмонова «Дарё» интернет-нашри учун эксклюзив интервью берди. Интервьюни журналист Феруз Муҳаммад ташкиллаштирди.

Юлдуз Усмонова ўзининг Instagram саҳифасига Гулнора Каримовани қўллаб-қувватлаётган ва унга озодлик сўраётган хонандаларни танқид қилган видеосини жойлагандан сўнг ижтимоий тармоқларда бир вақтлар «Гулисан» қўшиғини куйлаб, бугунги кунда бошқача муносабат билдираётгани кескин қораланган эди.

Юлдуз Усмонова суҳбат давомида Гулнора Каримова ҳақида куйлаган «Гулисан» қўшиғи буюртма бўлгани, ўша вақтларда бошидан нималар ўтгани ҳақида гапириб берди.

‘Гулисан’ қўшиғини буюртма қилинган қўшиқ деганман. Майли, мени ёлғончига чиқаринглар, лекин, менинг мусиқачиларим ҳали ўлгани йўқ, ўшандан кейин Америкага кетиб қолганлари бор, бу ерда ишлаётганлари бор, бемалол сўраб кўришингиз мумкин. Зокир акани ‘Афғон’ студиясида ёзганмиз. Қандай бўлганини ана ўшалардан сўрасангиз айтишади. Буюртма қилинган қўшиқ эди. Ижро этиш мажбуриятимиз бор эди. Мен ўша пайтда бир нарса дейишим мумкин эдими, бу ерда қизим, невараларим бор эди. Нима ҳам дея олардим. Кейин юртдан чиқариб юборишган, ҳамма нарсамни ташлаб кетдим. Ким туриб бера олди? Валломати ҳам ўша пайтларда индамай ўтирди-ку. Нега фақат мени гапираверишади? Ўша пайтда каллам кетишини пойлашганмиди? Нима қилишим керак эди?!

‘Асрлар садоси’ да қўшиқни ёзасан дейишди. Йўқ, ёзмайман дедим. Кейин хўжайиним Мансуржон орқали чиқишди. ‘Ёзсин, ўша ерда чиқиши керак’, дейишди. Биз ўша ерда чиқмаймиз дедим. ‘Ёзасиз, чиқаркансиз’, дейишди. Майли деб ёздик, лекин, ‘мени айтди дейсиз чиқмаймиз’, дедим. Чиқаётгандим, саҳнани олдигача борган эдим, саҳнани олдидан Шуҳрат Ғуломов келиб битта қоғоз кўрсатган. Президентимиз қўл қўйган қоғозда менинг исмим устидан, қизил билан, уриб, чизиб қўйилган экан.

Менинг нима қилишга ҳаққим бор эди. Ўлмай қолганимга Худога шукр. Мен нималарни яшаб ўтмадим. Ҳаммага гапириш осон. Осон тутганни бошига солсин, бошига солсинда кўрсин.  Гулнорадан аламим йўқ, унинг мард тарафлари ҳам бор эди. Ўзи еса ҳам бировга едирмас эди, ўзи чақса ҳам бировга чақдирмас эди. Шу одатлари бор эди, қўлдан келганича. Лекин, давлат бюджетини ўмариб қўйишди-да... Мен у ҳақда гапирган бўлсам, билганимни гапирдим. Уни ҳақорот қилганим йўқ. Халқни пулини қайтариб бер, бола-чақанг билан бемалол яша.

Юлдуз Усмонова, Ўзбекистон ва Қорақалпоғистон халқ артисти