Кент графлигида арслонларга қўшни сифатида тунаб қолиш мумкин бўлган ғаройиб меҳмонхона очилди (фото)

Ёввойи ҳайвонлардан чўчимасдан табиат қўйнида ухлаш Африка ва Осиёда амалга ошириш мумкин бўлган экстремал ишлардан бири ҳисобланади. Европада ҳам дам олиш кунларини мароқли ва саргузаштга бой ўтказмоқчи бўлганлар учун шундай имконият яратилди. Кент графлигида сафари-парк ҳудудида бир нечта бежирим уйчалар қад ростлади. Истаган сайёҳ бу ердан ўзига жой банд этиши ва жунгли ўрмонларининг подшоҳлари билан қўшничиликда маълум вақт яшаши мумкин.

Сафари ярим саҳроларида ёввойи табиат қўйнида завқ олишни истаган сайёҳлар энди Африкаю Осиё бурчакларига бормаса ҳам бўлади. Буюк Британияда саргузашт ихлосмандлари учун арслону йўлбарслар билан ёнма-ён, қўшничиликда тунаш имкониятини берувчи комплекс ишга тушган.

Кентдаги буюртма меҳмонхонаси Лймпне’да жойлашган сафари-парк ичида қурилган ва беш юлдузли меҳмонхона ҳисобланади.

Бу ерда сайёҳлар ёввойи ҳайвонларга, жумладан, бўри, айиқ, йўлбарс ва арслонларга қўшни сифатида уйчаларни ижарага олиши мумкин.

Ташриф буюрувчилар ҳайвонлардан чўчимай ухлаб, уйчада ўзини хотиржам ҳис эта олади.

Уйлар орасидаги энг ғаройиб кулба шерларга қўшни бўлгани. Ёввойи табиатдан завқ олувчи кишилар уйнинг улкан деразаларидан атрофда сайр қилиб юрган шерларни томоша қилади.

Меҳмонхона номерлари лофт услубида жиҳозланган, хоналарда улкан камин печлари, ҳайвонлар ҳужумидан ҳимояланган скандинав очиқ термал сув ҳавзалари мавжуд.

Меҳмонлар хона ётохонасидан арслонлар оиласи — Адрас ва Аудриканинг уч нафар шерваччани вояга етказаётганини томоша қилади.

Уйчада махсус бар, 2 метрли қандил ва боғ ҳовлисига олиб чиқувчи алоҳида йўлак ҳам бор.

Хоналарни банд қилиш ва ижарага олиш нархлари улардаги қулайликлар даражасига боғлиқ ҳолда ўсиб боради. Мунтазам ташриф буюрувчилар 1 750 фунт тўлаб меҳмонхонада тунаши мумкин. Ушбу нархларга нонушта, бир шиша шампан виноси, сафарини бепул сайр қилиш, Порт Лймпне қўриқхонасини айланиш ҳамда ёввойи ҳайвонлар яшовчи Хоулетс паркини кезиб чиқиш ҳам киритилган.

Комплекснинг бошқа номерларида тунаб қолиш нисбатан арзонроқ: йўлбарслар уйчаси — 1000 фунт, бўрилар уйи — 549 фунт, айиқлар ёнидаги номер — 350 фунт.

Бундай меҳмонхонада ўтадиган тун унутилмас воқеага айланади. Ёввойи ҳайвонлар билан мулоқотдан олинган таассуротлар ҳам инсон хотирасида узоқ вақт сақланиб қолади.