Yovvoyi hayvonlardan cho‘chimasdan tabiat qo‘ynida uxlash Afrika va Osiyoda amalga oshirish mumkin bo‘lgan ekstremal ishlardan biri hisoblanadi. Yevropada ham dam olish kunlarini maroqli va sarguzashtga boy o‘tkazmoqchi bo‘lganlar uchun shunday imkoniyat yaratildi. Kent grafligida safari-park hududida bir nechta bejirim uychalar qad rostladi. Istagan sayyoh bu yerdan o‘ziga joy band etishi va jungli o‘rmonlarining podshohlari bilan qo‘shnichilikda ma’lum vaqt yashashi mumkin.
Safari yarim sahrolarida yovvoyi tabiat qo‘ynida zavq olishni istagan sayyohlar endi Afrika-yu Osiyo burchaklariga bormasa ham bo‘ladi. Buyuk Britaniyada sarguzasht ixlosmandlari uchun arslon-u yo‘lbarslar bilan yonma-yon, qo‘shnichilikda tunash imkoniyatini beruvchi kompleks ishga tushgan.
Kentdagi buyurtma mehmonxonasi Lympne’da joylashgan safari-park ichida qurilgan va besh yulduzli mehmonxona hisoblanadi.
Bu yerda sayyohlar yovvoyi hayvonlarga, jumladan, bo‘ri, ayiq, yo‘lbars va arslonlarga qo‘shni sifatida uychalarni ijaraga olishi mumkin.
Tashrif buyuruvchilar hayvonlardan cho‘chimay uxlab, uychada o‘zini xotirjam his eta oladi.
Uylar orasidagi eng g‘aroyib kulba sherlarga qo‘shni bo‘lgani. Yovvoyi tabiatdan zavq oluvchi kishilar uyning ulkan derazalaridan atrofda sayr qilib yurgan sherlarni tomosha qiladi.
Mehmonxona nomerlari loft uslubida jihozlangan, xonalarda ulkan kamin pechlari, hayvonlar hujumidan himoyalangan skandinav ochiq termal suv havzalari mavjud.
Mehmonlar xona yotoxonasidan arslonlar oilasi — Adras va Audrikaning uch nafar shervachchani voyaga yetkazayotganini tomosha qiladi.
Uychada maxsus bar, 2 metrli qandil va bog‘ hovlisiga olib chiquvchi alohida yo‘lak ham bor.
Xonalarni band qilish va ijaraga olish narxlari ulardagi qulayliklar darajasiga bog‘liq holda o‘sib boradi. Muntazam tashrif buyuruvchilar 1 750 funt to‘lab mehmonxonada tunashi mumkin. Ushbu narxlarga nonushta, bir shisha shampan vinosi, safarini bepul sayr qilish, Port Lympne qo‘riqxonasini aylanish hamda yovvoyi hayvonlar yashovchi Xoulets parkini kezib chiqish ham kiritilgan.
Kompleksning boshqa nomerlarida tunab qolish nisbatan arzonroq: yo‘lbarslar uychasi — 1000 funt, bo‘rilar uyi — 549 funt, ayiqlar yonidagi nomer — 350 funt.
Bunday mehmonxonada o‘tadigan tun unutilmas voqeaga aylanadi. Yovvoyi hayvonlar bilan muloqotdan olingan taassurotlar ham inson xotirasida uzoq vaqt saqlanib qoladi.
Izoh (0)