Youtube бош директори Сьюзан Войчицки ўз фарзандларига Youtube’да видео кўришга рухсат бермайди. Spot’нинг ёзишича, бу ҳақда у CBС нашрига берган интервьюсида маълум қилган.
Қайд этилишича, унинг фарзандлари фақат болалар учун мўлжалланган Youtube Kids’дан фойдаланади, холос. «Мен болаларимга Youtube Kids’дан фойдаланишга рухсат бераман, лекин уларга сарфлайдиган вақтини чеклайман. Менимча, ҳар қандай нарсанинг чексиз бўлиши бу яхши эмас», — деган Войчицки.
Youtube Kids — 13 ёшдан кичик бўлган болаларга мўлжалланган махсус версия. У болаларни номақбул видеолардан ҳимоя қилиши керак эди. Бироқ платформанинг бу версиясида ҳам шавқатсиз ва уятсиз видеолар пайдо бўлган. Бу муаммолар компанияни кучлироқ ота-оналар назоратини ўрнатишга ундади.
Сентябрь ойида АҚШ Федерал савдо комиссияси Youtube болаларнинг интернетдаги шахсий маълумотларини ҳимоя қилиш тўғрисидаги қонунчиликни бузгани учун 170 миллион доллар жарима билан жазолаган.
Агентлик Youtube ёш болаларнинг шахсий маълумотларини ота-оналарининг розилигисиз ноқонуний тўплаш орқали миллионлаб даромад олганини таъкидлаган. Youtube бунга жавобан ота-оналарга Youtube Kids иловасидан фойдаланишни маслаҳат берган.
Изоҳ (0)