Бош прокуратура ижтимоий тармоқларда тарқалган Жаҳонгир Ортиқхўжаевга тегишли аудиоёзувдаги ҳолатларни текшириш юзасидан баёнот берди.
Жорий йилнинг 16 ноябрь куни интернет нашрларида Тошкент шаҳар ҳокими, сенатор Жаҳонгир Ортиқхўжаевга тегишли ҳамда ҳақорат, таҳдид мазмунидаги аудиоёзув тарқалди. Мазкур ҳолат оммавий ахборот воситалари, блогерлар, сиёсий партиялар, энг ачинарлиси, айрим хорижий экспертлар ҳамда халқаро ташкилотларнинг кескин танқидий муҳокамаларига сабаб бўлди.
Бош прокуратура томонидан мазкур ҳолатга ҳуқуқий баҳо бериш мақсадида Жиноят процессуал кодексининг 329-моддасига асосан терговга қадар текширув ўтказилди.
Аниқланишича, жорий йилнинг 14 август куни «Kun.uz» таҳририятига «Хива строй» МЧЖ раҳбарининг бажарилган қурилиш ишлари учун буюртмачидан пул ундиришга оид мурожаатини ўрганиш мақсадида мазкур таҳририят мухбири Р.Исроилов ва оператори Ш.Эгамбердиевлар Олмазор туман ҳокимлигига борган.
Туман ҳокими ўринбосари Абдурасул Ваҳобов давлат хизматчиси бўла туриб, тегишли одоб-ахлоқ қоидаларига зид равишда Р.Исроиловга тушунтириш беришдан бош тортган, улар билан қўпол муносабатда бўлган ҳамда операторнинг видеотасвирга олишига қаршилик кўрсатган. Мазкур воқеанинг эртасига «Kun.uz» таҳририяти ушбу видеолавҳани ўз сайтида эълон қилган ва бу кенг муҳокамаларга сабаб бўлган.
Шу куни кечқурун Тошкент шаҳар ҳокими Жаҳонгир Ортиқхўжаевнинг вазиятни юмшатиш ва муросага келиш тўғрисидаги топшириғига асосан шаҳар ҳокимлигининг ахборот хизмати раҳбари Л.Сабирова, туман ҳокими ўринбосари Абдурасул Ваҳобов таҳририят вакиллари Б.Ахмедов, Р.Исроилов ва Ш.Эгамбердиевлар билан шаҳар ҳокимлиги биносида учрашган.
Унда Абдурасул Ваҳобов ножўя ҳаракатларга йўл қўйганлигини тан олган ва таҳририят ходимларидан узр сўраган. Бироқ бу ҳолат таҳририят ходимларини қониқтирмаган.
Учрашув якун топгач, мулоқот иштирокчилари бинонинг йўлагида Жаҳонгир Ортиқхўжаевга тасодифан дуч келган. Л.Сабирова Жаҳонгир Ортиқхўжаевга бўлиб ўтган суҳбат ҳақида маълумот бериб, «Kun.uz» ходимлар Абдурасул Ваҳобовнинг узридан қаноатланмаганлигини баён қилган.
Шунда Жаҳонгир Ортиқхўжаев улар билан мулоқотда муомала маданиятидан четга чиққан ҳолда интернет нашрларига нисбатан ўзининг салбий муносабатини ифодалаб, гўёки уларни шармандали вазиятларга тушириш имкониятига эгалигини, лекин у бундай тарбияланмаганлиги ва буни хоҳламаслигини билдирган.
Ушбу жараённи «Kun.uz» мухбири Б.Ахмедов «Журналистлик фаолиятини ҳимоя қилиш тўғрисида»ги қонун талабларига зид равишда учрашув иштирокчиларини огоҳлантирмасдан телефонига хуфёна ёзиб олган ва таҳририятга тақдим этган.
Ўз навбатида таҳририят томонидан ноқонуний йўл билан олинган ахборот йўқ қилинмаган. Оқибатда 2019 йил 16 ноябрда ҳоким Жаҳонгир Ортиқхўжаевни обрўсизлантириш мақсадида аудиоёзувнинг ножўя сўзлардан иборат бир ярим дақиқалик қисми (учрашув икки соат давом этган) монтаж қилиниб, номаълум шахс томонидан ижтимоий тармоқларда тарқатилган. Бу ҳолат ўз навбатида оммавий ахборот воситаларида кенг муҳокамага сабаб бўлган.
«Kun.uz» таҳририяти ўз айбини англаган ҳолда ҳақиқий ҳолатни маълум қилиш учун аудиоёзувнинг Жаҳонгир Ортиқхўжаевга тегишли қисмини тўлиқ эълон қилган.
Терговолди текширувида аниқланишича, Жаҳонгир Ортиқхўжаев давлат ҳокимияти ва бошқаруви органи мансабдор шахси бўла туриб, давлат хизматчисининг одоб-ахлоқ қоидаларига риоя қилмасдан ҳақоратли ва қўпол сўзларни ишлатган. Бироқ унинг ножўя сўзлари умумий тарзда айтилгани, муайян шахсга қаратилмаганлиги, реал таҳдид йўқлиги боис Жаҳонгир Ортиқхўжаевнинг ҳаракатларида жиноят аломатлари мавжуд эмас.
Шу сабабли ЖПКнинг 83-моддаси 2-қисмига асосан жиноят иши қўзғатишни рад қилиш ҳақида қарор қабул қилинди. Шунингдек, «Kun.uz» таҳририяти ходимлари Жаҳонгир Ортиқхўжаевга нисбатан даъво ёки эътирозлари йўқлигини баён қилди.
Лекин Жаҳонгир Ортиқхўжаев Вазирлар Маҳкамасининг 2016 йил 2 мартдаги қарори билан тасдиқланган «Давлат бошқаруви органлари ва маҳаллий ижро этувчи ҳокимият органлари ходимларининг одоб-ахлоқ намунавий қоидалари»ни бузганлигини инобатга олиб, унинг интизомий жавобгарлиги масаласини кўриб чиқиш учун ҳукуматга мурожаат қилинди.
Эслатиб ўтамиз, 16 ноябрь куни ижтимоий тармоқларда Тошкент шаҳар ҳокими Жаҳонгир Ортиқхўжаевнинг журналистларни йўқ қилиш, гейга чиқариш билан таҳдид қилгани ҳақидаги аудиоёзув тарқалган эди.
Ҳокимнинг журналистларга таҳдидини «Адолат», ЎзХДП, ЎзЛиДеП партиялари, шунингдек, Ўзбекистон Журналистлари ижодий уюшмаси қоралаб чиққан, Бош прокуратура ва Адлия вазирлиги ушбу ҳолат юзасидан ўрганиш олиб бораётганини маълум қилганди. Жаҳонгир Ортиқхўжаев ўзи ҳақорат ва таҳдид қилган журналистлар билан учрашгач, тушунмовчиликка барҳам берилган. Ҳокимнинг мухбирлар билан мулоқотидан батафсил аудио ва стенограмма эълон қилинган.
Изоҳ (0)