Шофиркон туманида ҳайдовчи ва ўсмирлар ўртасидаги тортишув жанжалга айланиб кетди. Бу ҳақда «Замон» ахборот дастури хабар бермоқда.
Тумандаги «Қайрағоч» маҳалласида яшовчи фуқаро ўзининг Spark машинасида туман маркази томон кетаётганида бир машина аранг сиғадиган йўлнинг қатнов қисмидаги икки ўсмирга четга чиқиш ишорасини беради. Буни гўёки камситиш тариқасида қабул қилган ўсмирлар эса сўкинган. Машинада оиласи, набиралари билан кетаётган ҳайдовчига бу оғир ботган.
— Автомобилдан тушиб, уларнинг кимлиги, ота-онасини суриштирдим. Узр сўраш ўрнига яна сўкинди улар. Биттасига шапалоқ тортиб юбордим, — дейди ҳайдовчи.
Шапалоқ еган ўсмирлардан бири отасига қўнғироқ қилади. Жанжал жойига етиб келган фуқаро ва унинг қариндошлари ҳайдовчи ҳамда унинг қишлоқдошлари билан можарога боради. Ёғоч билан уриб, уларга тан жароҳати етказади.
Мазкур ҳолат юзасидан ЖКнинг тегишли моддалари билан жиноят иши қўзғатилиб, тергов ҳаракатлари олиб борилмоқда. Можаронинг 5 нафар иштирокчисига нисбатан қамоққа олиш эҳтиёт чораси қўлланилган.
Изоҳ (0)