Мажбурий ижро бюроси Фарғонада таъминотчи корхонадаги ўзлаштиришни аниқлади. Бу ҳақда бюро матбуот хизмати «Дарё»га хабар берди.
Мажбурий ижро бюроси Фарғона вилояти бошқармаси ва бюронинг Қўштепа тумани бўлими тезкор ходимлари томонидан Қўштепа туман электр тармоқлари корхонасида ўтказилган ўрганиш давомида, туман ЭТК ҳисобчиси Ю.А. корхонада электр ҳисобини юритишда «Электр ҳисоб» расмий дастурида ишлаш учун унга ишониб топширилган электрон калит «парол имзо» орқали компьютер техникаси воситаларидан фойдаланган ҳолда 2014 йил ноябрь ойидан 2019 йил август ойига қадарли, турли вақтларда ЭТК истеъмолчиси бўлган 16 та юридик корхоналарининг электр ҳисоблаш коэффициентларига ғаразли ниятларда ўзгартиришлар киритиш орқали ўзганинг мулкини растрата қилиш йўли билан талон-торож қилиб, давлат манфаатларига 504 577 кВт соат ёки кўп миқдорда 101 589 467 сўм моддий зарар етказганлигини аниқланган.
Бундан ташқари, Фарғона вилоят ХЕТК мутахассислари томонидан берилган 26 сентябрдаги 7295-15-3-сонли қайта ҳисоб-китоб хулосасига кўра, корхона ҳисобчиси Ю.А. ўзига бириктирилган электрон калит орқали 16 та юридик истеъмолчиларнинг ҳисоблагичларига фойдаланаётган электр энергиясини ҳисобга олиш учун ўрнатилган токтрансформатор коэффицентларини 26 маротаба асоссиз равишда ўзгартирилганлиги оқибатида, «Фарғона ХЕТК» АЖ манфаатларига 504 577 кВт.соат ёки ушбу ҳаракат содир этилган давридаги даврларга мутаносиб равишда 101 589 467 сўмлик электр энергиясини истеъмолчиларга ҳисоб-китоб қилинмаганлиги кўрсатилган.
Мазкур ҳолат бўйича текшириш ишлари давом эттирилмоқда.
Изоҳ (0)