Хитой Эроннинг ядро келишуви бўйича ўз мажбуриятларини бажариши ва унга амал қилишига умид билдирмоқда. Бу ҳақда 8 ноябрда Хитойнинг Яқин Шарқ масалалари бўйича вакили Чжай Сзюн маълум қилди, деб ёзган «Regnum».

Фото: АП

Чжай Сзюннинг сўзларига кўра, Хитой ҳукумати барча томонларнинг шартнома талабларини бажариши ва келишув шартларини бузиб, вазиятни чигаллаштириши мумкин бўлган ҳаракатларни амалга оширмаслик тарафдори.

Мавзуга доир: Япония ва Франция Эронга 18 млрд доллар кредит таклиф қилади

2015 йилда олтилик, яъни Буюк Британия, Германия, Хитой, Россия, АҚШ ва Франция Эрон билан ядро дастури бўйича биргаликдаги кенг қамровли ҳаракатлар режасини ишлаб чиқди. Келишувга кўра, Эронга қўлланилган санкциялар ядро дастурида чекловлар қўллаш эвазига олиб ташланиши кўзда тутилганди. Шартноманинг дастлабки кўриниши уч йил ҳам амал қилмади: 2018 йил май ойида АҚШ келишувдан чиқишини эълон қилди ва Эрон ислом республикасига нисбатан кескин санкциялар қўллади.

Мавзуга доир: Эрон санкциялар сабаб ўз портларида кемалар юкини тушира олмаётгани ҳақидаги хабарларни рад этади

Теҳрон эса АҚШ келишувдан чиққанидан бир йил ўтгач «стратегик сабр-тоқат»дан кейин жорий йилнинг 8 майида ядро дастуридаги чекловларни тан олмай ҳаракат қилишни бошлади. Ядро дастури бўйича биргаликдаги кенг қамровли ҳаракатлар режасини бажармасликнинг биринчи босқичи уранни бойитиш ва оғир сув бўйича чекланган меъёрларни бузиш бўлди. Кейинчалик Эрон режага амал қилмасликнинг иккинчи босқичига ўтди, яъни уран мамлакат учун керакли миқдорда бойитилиши эълон қилинди. Учинчи босқич 6 сентябрда бошланди: Эрон режада ва ундаги низомларда белгиланган чегараларни четлаб ўтган ҳолда ядро тадқиқотлари бўйича ишларни амалга оширди. 6 ноябрдан Теҳрон ядро келишувидаги мажбуриятларини қисқартиришнинг тўртинчи босқичига старт берди.