Ўтган ўн ой давомида неча кишига Тошкент шаҳар пропискаси берилгани маълум қилинди
7 ноябрь куни Ахборот ва оммавий коммуникациялар агентлигининг анжуманлар залида «Ички ишлар органларида миграция жараёнлари ва фуқароликни расмийлаштириш соҳасида амалга оширилаётган чора-тадбирлар ҳақида» мавзусида матбуот анжумани ташкил этилди, деб хабар берди «Халқ сўзи Онлайн».
Матбуот анжуманида Ички ишлар вазирининг матбуот котиби, полковник Шоҳрух Ғиёсов, вазирлик Миграция ва фуқароликни расмийлаштириш бош бошқармаси раҳбарияти, масъул ходимлари, шунингдек, республика ва хорижий ОАВ вакиллари иштирок этди.
Таъкидланишича, жорий йилнинг ўтган ўн ойи мобайнида Ўзбекистон Президентининг 23 та фармони асосида 4 951 нафар фуқаролиги бўлмаган шахслар Ўзбекистон Республикаси фуқаролигига қабул қилинган.
Тегишли ҳужжатга мувофиқ, жами 56 та давлат фуқароларига 30 суткагача визасиз мамлакатга келишлари, бу ерда бўлишлари, 111 та давлат фуқароларига республика ҳудудида кўчмас мулк сотиб олиш ва яшаш гувоҳномасини олиш ҳуқуқи, 76 та давлат фуқароларига электрон виза расмийлаштириш, бундан ташқари, «Ватандош», «Инвестиция» визалари ҳамда «Фахрий фуқаро» гувоҳномаси жорий этилган.
Шунингдек, Ички ишлар вазирлигининг 2012 йил 1 майдаги «Ўзбекистон Республикаси фуқароларини Тошкент шаҳри ва Тошкент вилоятида доимий прописка қилиш тартиби тўғрисидаги йўриқномани тасдиқлаш ҳақида»ги буйруғи асосида ўн ой давомида Тошкент шаҳри бўйича жами 32 380 нафар, Тошкент вилояти бўйича 7 462 нафар фуқаро доимий рўйхатга олинган.
