Ўзбекистонда бир нечта автомобиль газ тўлдириш компрессор шохобчалари (АГТКШ) иш фаолияти вақтинчалик тўхтатилди. Бу ҳақда Энергетика вазирлиги матбуот хизмати хабар берди.
«Бугунги кунда бензининг сотилаётган нархи ошиб бориши сабабли автомобилларни муқобил ёнилғи турига ўтказиш, яъни сиқилган табиий газ (метан)га қайта мослаштирилаётган автотранспортларнинг сони кескин ўсиб борилиши кузатилмоқда. Шунга қарамай, метанга бўлган талабнинг кескин ўсиши билан автомобилларга газ тўлдириш компрессор шохобчалари (АГТКШ)ларда, автотранспортга ёнилғи қуйиш жараёнида, инсон ҳаётига хавф туғдирмаслик учун барча техник қоидалар, йўриқномалар ва кўрсатмаларга риоя қилиши мажбурдир. Афсуски, ҳозирги пайтда транспорт воситалари эгалари ҳамда автомобилларга ёнилғи қуйиш шохобчаларнинг ходимлари томонидан қоидаларга риоя қилмаслиги тез-тез учраб туради.
Шу сабабли, АГТКШларнинг фаолиятини доимий равишда мониторинг қилиш, «Ўзнефтгазинспекция»нинг вазифаларидан биридир», — дейилади хабарда.
Жорий йилнинг сентябрь ойида «Ўзнефтгазинспекция» томонидан Ўзбекистондаги 60 та АГТКШда назорат тадбирлари ўтказилди. Тадбирлар натижасида бир қатор қўпол қоида бузилишлар ҳолатлари аниқланди. Жумладан, 220 кг/см2 босим остида автомобилларни газ билан тўлдирилиши, назорат пости билан таъминланмаганлиги, газ баллонларга тегишли ҳужжатларни кўздан кечирилмаслиги ва инсонга хавф келтирадиган бир қатор бошқа қоидабузарликлар аниқланди.
Қайд этилишича, назорат тадбирлари ўтказилган 60 та АГТКШлардан 13 тасининг иш фаолияти вақтинчалик тўхтатилган.
Изоҳ (0)