«Ўзбеккино» миллий агентлигида давлат буюртмаси асосида ишлаб чиқарилган бадиий фильмлар рекламаси ҳамда телевидение, радио ва интернет тармоқларида тарғибот кампаниясини ташкил этиш ва амалга ошириш чора-тадбирларига бағишланган йиғилиш ўтказилди, деб хабар бермоқда ЎзА.

Унда кинопрокатдаги муаммоларга барҳам бериш билан боғлиқ масала кўриб чиқилди. Миллий кино маҳсулотларининг тарғибот кампанияси тизимли ташкил этилмаётгани, ижтимоий тармоқлар, оммавий-ахборот воситалари имкониятларидан самарали фойдаланилмаётганлиги сабабли фильмларга нисбатан томошабинлар қизиқиши пасайиб, кинопрокат фаолиятидан олинаётган тушумлар кутилган натижа бермаётгани ва бу каби муаммоларга барҳам бериш кераклиги ҳақида сўз юртилди.

Кинопрокатни ривожлантириш, уларнинг реклама тарғиботини юқори даражада ташкил этиш борасидаги ҳаракатлар республиканинг чекка ҳудудларидан бошланиши, жумладан, кинотеатрлар сонини кўпайтириш, киночиптплар нархини аҳолига қулай тарзда арзонлаштиришга келишиб олинди.

Шунингдек, давлат буюртмаси асосида ишлаб чиқарилган «Қўқон шамоли», «1 август» ва «Авлоний» номли бадиий фильмлар тўғрисида аҳолини тўлиқ хабардор қилиш, ушбу фильмлар тақдимотини юқори савияда ўтказиш бўйича тавсиялар берилди

Унга кўра, «1 август» фильми премьераси 26 ноябрда, «Авлоний» фильми 6 декабрда, «Қўқон шамоли» эса 19 декабрда намойиш этиладиган бўлди. Мазкур фильмлар тақдимоти жорий йил якунига қадар Тошкент, Самарқанд, Термиз, Наманган ва Нукус шаҳарларида ташкил этилади.