Йигирма йил аввал тожикистонлик Жам Жўрабоев ўзи маъмур бўлиб ишлайдиган Туркиядаги интернет-клуб полига ўрнатилган картон қутиларда тунаб юрарди. Ҳозирда у дунёдаги энг харидоргир концепт-дизайнерлардан бири ва Жорж Лукас ҳамда Marvel қаҳрамонлари қиёфасини яратмоқда.
Жам Жўрабоевнинг ҳаёти ҳам Голливуд фильмлари сценарийсини эслатади: туғилиб-ўсган юрти Тожикистондан фуқаролар уруши пайти бош олиб кетган, Туркияда муҳтожликдан азият чеккан, уйга қайтган ва Ustodesign компаниясида дизайнер сифатида иш бошлаган.
Жўрабоев Ustodesign жамоаси билан таълим лойиҳалари ва профессионал мусобақаларни ёритиб борадиган Cgsociety лойиҳаси сайтида эълон қилинган концепт-дизайнерлар учун танловда иштирок этишга қарор қилди. Жамоага энг яхши видео-продакшн учун мукофот берилди.
Ушбу ғалабадан сўнг Жам Moving Picture Company (MPC) компанияси Лондон бўлинмаси продюсеридан мактуб олди ва унинг таклифига биноан 2011 йил октябрида Британия пойтахтига келди. У MPC реклама командаси билан лойиҳани икки ой ичида якунлади ва Тожикистонга қайтиб кетди. Яна ярим йил компания билан фрилансерлик асосида ҳамкорлик қилди.
MPC компаниясидаги фаолият Жўрабоев олдин ижодини фақат форумларда кузатган концепт-дизайнерларнинг ёпиқ оламига эшик очди. 2014 йилда у ҳақда «Гарри Потер», «Ўргимчак-одам» ва бошқа фильмлар учун визуал эффектлар яратган Framestore компанияси хабар топди. Framestore Жўрабоевга у орзу қилган кино бўлимида иш ва йилиги 60 000 фунт (ўша пайтда 90 минг доллар) маош таклиф қилди.
Икки йил ичида Жам Framestore’да «Қасоскорлар: Алтрон асри», «Юра даври дунёси», «Фантастик махлуқлар ва улар қаерда истиқомат қилади», «Конг: бош суяк ороли», «Геошторм», шунингдек, Стивен Спилбергнинг «Биринчи ўйинчи тайёргарлик кўрсин» фильмлари устида ишлади.
Ҳозирда Жўрабоев фрилансер мақомида Голливуд режиссёрлари буюртмаси асосида ишлашда давом этмоқда, шунингдек, кино концепт-дизайни бўйича маҳорат сабоқлари ўтмоқда. Буларнинг барчаси унга йилига 800 минг доллар даромад келтиради.
Изоҳ (0)