Қорақалпоғистон республикаси пахтакорлари 2019 йилги пахта хом ашёсини топшириш бўйича йиллик шартномавий режасини 100,54 фоизга ортиғи билан бажарди, деб хабар берди ЎзА.
2019 йил режасига кўра, Оролбўйи пахтакорлари давлатга 184 минг 200 тонна пахта хом ашёси топшириши белгиланган бўлиб, 2019 йил 26 октябрь ҳолатига кўра, ҳудуддаги жами 2 минг 523 фермер хўжаликлари ўз режаларини 100,54 фоизга ортиғи билан уддалаб, 185 минг 195 тонналик катта хирмон кўтарди. Шундай қилиб, Қорақалпоғистон республикаси пахтакорлари Фарғона ва Андижон вилоятларидан кейин учинчи бўлиб зафар маррасига етди.
«Бу қорақалпоғистонлик пахтакорлар учун катта ғалаба бўлди. Чунки ҳудуддаги оғир экологик вазият, ерларнинг шўрланиш даражасининг юқорилиги, мелиоратив ҳолатининг барқарор эмаслиги, ноқулай об-ҳаво шароити маҳаллий деҳқон-фермерлар учун пахта ҳосилини етиштириш, парваришлаш ва йиғиб олишда қийинчиликларни юзага келтирди.
Бугунги кунга Тахиатош, Амударё, Нукус, Беруний, Қораўзак, Элликқалъа ҳамда Тахтакўпир туманлари пахтакорлари ҳам пахта етиштириш бўйича шартномавий режаларини ортиғи билан бажариб, мамлакатимиз хирмонининг юксалишига катта ҳисса қўшди», — дейилади хабарда.
Изоҳ (0)