АҚШ Махфий хизмати рэпер Эминем президент Дональд Трамп ва унинг қизи Иванка тилга олинган қўшиқ туфайли сўроққа тутилганини тасдиқлади. Бу ҳақда Meduza хабар бермоқда.
Фото: Buzzfeed News
Framed номли қўшиғида Эминем АҚШ президентини Дональд Дак деб атаган. Иванка Трампнинг эса «ҳовузда чўкиб кетгани» билдирилган. Қўшиқда президентнинг қизига таҳдид оҳанглари бор.
Эминем 2018 йил 16 январда сўроқ қилинган. Унинг давомида рэпердан нафақат Framed қўшиғи, балки 2017 йил октябрида BET Awards мукофотини топшириш маросимидаги Трамп танқид қилинган чиқиши ҳақида ҳам изоҳ олинган.
Рэпер билан бўлиб ўтган суҳбатдан сўнг Махфий хизмат ишни кўриб чиқиш учун прокуратурага юбориб ўтирмади.
Эминем Махфий хизматдаги сўроқ ҳақида 2018 йил августида чиққан Kamikaze альбомидан ўрин олган The Ringer қўшиғида эслатиб ўтган. Қўшиқда рэпер АҚШ президенти террорчилар билан алоқаси ва Трампга зарар етказиш истаги бор-йўқлигини аниқлаш учун Махфий хизмат ходимларини юборгани ҳақида ҳикоя қилади.
