«Каттақўрғон» полигонидаги машғулотда вертолёт, танк ва зирҳтешар снарядлар ишлатилди (фото)
Марказий ҳарбий округига қарашли «Каттақўрғон» полигонида 10 октябрь куни аралаш таркибдаги жанговар техника ва бўлинмалар билан амалий машғулот ўтказилди, деб хабар беради Марказий ҳарбий округ матбуот хизмати.
Уч кун давом этган машғулотларда, бир вақтнинг ўзида 30 га яқин ўқув жойларида отиш машқлари ташкил этилган. Тонгда махсус бўлинмалар вертолёт авиацияси орқали белгиланган жойга десантлаштирилган. Артиллерия бўлинмалари разведка маълумотига таяниб 15 км масофадаги, «зенит»чилар эса ҳаводаги нишонларни бирин-кетин яксон қилган.
«Жанговар танклар машқ бажариш қоидасига кўра, ёндан ҳаракатланиб, 125 ммли тўплардан отилган «осколкали парчаланувчи», «кумулятив» ҳамда «зирҳтешар» снарядлар 1200 метр масофадаги мўлжални йўқ қилди», — дейилади хабарда.
Танкчилар билан амалий ҳайдаш машғулотлари ҳам ташкил этилган. Ҳарбий хизматчилар штатдаги кичик калибрли қуроллардан жанговар тайёргарликнинг янгича усулларини қўллаган ҳолда машқ бажарган.
