Мажбурий ижро бюроси Самарқанд вилоят бошқармаси ижтимоий тармоқларда «МИБчилар ўз бошлиғининг оғзи шалоқлигидан арз қилди» сарлавҳаси остида жойлаштирилган хабарларга расмий муносабат билдирди, деб хабар беради «Kun.uz».

Кадр: YouTube

Видеода тасвирланишича, Мажбурий ижро бюроси Пайариқ туман бўлими бошлиғи Зафар Қосимов ўз қўл остидаги ходимларни кечқурун йиғиб, уларнинг орасидан ундирув режасини бажармаган ходимларни ўта қўпол ва ножўя сўзлар билан ҳақоратлаб, шаънини камситган.

«Хабарларга кўра, Мажбурий ижро бюросининг Пайариқ туман бўлими бошлиғи Зафар Қосимовнинг ходимларни белгиланмаган режани бажармагани учун ножўя сўзлар билан ҳақорат қилгани баён қилинган.

Ўрганишда, бюронинг Пайариқ туман бўлими бошлиғи Зафар Қосимов жорий йилнинг 15 сентябрь куни соат 21:00 ларда бўлим биносида бўлимда фаолият кўрсатувчи 33 нафар давлат инспекторлари билан аҳоли ва улгуржи ташкилотлардан энергия ресурслари ва сув истеъмолидан бўлган ундирувни ундириш аҳволи юзасидан йиғилиш ўтказгани маълум бўлди.

Йиғилишда, айрим ходимларнинг белгиланган ундирув режаларини бажармаганликларини важ қилиб, давлат инспекторларини ҳар хил ножўя сўзлар билан ҳақорат қилгани аниқланди.

Мазкур ҳолат бўлимнинг айрим ходимлари томонидан уяли телефон орқали видеога олиниб, онлайн нашрлар ва ижтимоий тармоқларга юборилгани маълум бўлди.

Олиб борилган текширувлар давомида бюронинг Пайариқ туман бўлими бошлиғи Зафар Қосимов юқоридаги ҳолатларни тасдиқлаб, содир этган номуносиб хатти-ҳаракатлари учун бўлим ходимларидан кечирим сўраган.

Ҳозирда, Зафар Қосимовнинг хатти-ҳаракатлари юзасидан хизмат текшируви олиб борилмоқда. Текширув натижалари маълум қилинади», — дейилади МИБнинг Самарқанд вилоят бошқармаси муносабатида.

Эслатиб ўтамиз, Фарғона вилояти ҳокими, сенатор Шуҳрат Ғаниевнинг ижтимоий тармоқларда соқол, рўмол ва иш жойларида намозга қарши чиқиб, бунга бўйсунмаганларни қамаш билан таҳдид қилгани муҳокама қилинган аудиоси тарқалганидан сўнг, Президент ва сенаторлардан узр сўраган эди.

Куни кеча Қашқадарёда даладан рухсатсиз маккажўхори терган кекса кишини ушлаб, уни неваралари олдида ҳақорат қилган Миришкор тумани ҳокими ҳам ўз хатти-ҳаракати учун узр сўраганди.