Афғонистон сайловлар шаффофлиги фондининг (TEFA) кузатувчилари мамлакатда ўтган президентлик сайловларида номзодларнинг биринчи турда ғалаба қозониш учун етарли даражада овоз йиға олмаганини ва сайловларнинг иккинчи тури ўтказилиши мумкинлигини маълум қилди, деб ёзмоқда «РИА Новости».

Фото: Al Jazeera

«Биздаги маълумотларга кўра, сайловлар ғолиби биринчи раундда маълум бўлмайди ва овозларнинг кўп қисмини олган номзодлар ўртасида сайловларнинг иккинчи тури ўтказилиши мумкин», — дея таъкидлаган TEFA вакили Зубайр Ҳабибзода.

Ўз навбатида Афғонистон мустақил сайлов комиссияси котиби Ҳабибур Раҳмон Нанг иккинчи тур бўлиши ёки бўлмаслиги борасида аниқ фикрни бюллетенлар ҳисоблаб чиқилганидан кейин маълум қилинишини билдирди.

Афғонистонда президентлик сайловлари 28 сентябрда ўтказилган. Овоз бериш жараёнлари «Толибон» ҳаракатининг сайловларни бузишга уриниш ҳақидаги баёнотидан сўнг хавфсизлик чоралари кучайтирилган вазиятда ўтди. Бироқ сайловлар олдидан ва сайловлар ўтказиладиган санада мамлакат бўйлаб терактлар, портлашлар, кузатувчиларнинг ўғирлаб кетилиши ҳолатлари кузатилди.

Сайловларда жами 15 нафар президентликка номзод иштирок этди, кураш уч асосий сиёсий гуруҳ ўртасида кечди: амалдаги президент Муҳаммад Ашраф Ғани, амалдаги бош вазир Абдулла Абдулла ҳамда мухолифат яъни собиқ президент Ҳамид Карзай гуруҳи. Аввалига президентликка ўз номзодини қўйганлар сони 18 та эди, бироқ уларнинг уч нафари амалдаги президентни қўллаб-қувватлашини билдириб, ўз номзодини олди.

Сайловларда ғалаба қозониш учун 50 фоиз ёки ундан кўпроқ овоз тўплаш лозим. Агар бюллетенларни ҳисоблаш жараёни кўнгилдагидек кечса сайловларнинг дастлабки натижалари 19 октябрда, якуний натижалар эса номзодларнинг шикоятлар қайта кўриб чиқилганидан сўнг 7 ноябрда эълон қилиниши режалаштирилган. Номзодларнинг ҳеч бири керакли миқдордаги овозларни тўплай олмас, у ҳолда 23 ноябрда сайловларнинг иккинчи тури бўлиб ўтади.