Олий Мажлис Сенатида 9 октябрь, чоршанба куни Танзила Норбоева раислигида Одам савдосига ва мажбурий меҳнатга қарши курашиш миллий комиссияси йиғилиши ўтказилди, деб хабар бермоқда Сенат ахборот хизмати.

Фото: Сенат

Йиғилишда Одам савдосига ва мажбурий меҳнатга қарши курашиш миллий комиссияси зиммасига юклатилган вазифаларнинг ижросини таъминлаш борасида амалга оширилаётган ишлар муҳокама қилинган.

Жумладан, Миллий комиссия ва унинг таркибида ташкил қилинган Одам савдосига қарши курашиш ҳамда Мажбурий меҳнатга қарши курашиш масалалари бўйича кичик комиссиялар низомлари, 2019—2020 йилларда одам савдоси ва мажбурий меҳнатга қарши курашиш соҳасида давлат органлари фаолияти самарадорлигини ошириш бўйича биринчи навбатдаги чора-тадбирлар режаси (йўл харитаси) лойиҳалари кўриб чиқилган.

Шунингдек, кичик комиссиялар ҳамда ҳудудий комиссиялар иш фаолияти самарадорлигини ошириш, уларнинг ҳисоботларини юритиш, хорижда бўлган Ўзбекистон фуқароларининг ҳуқуқ ва эркинликлари ҳимоя қилинишини таъминлаш масалалари, бу борада Миллий комиссия томонидан келгусида амалга оширилиши лозим бўлган вазифалар юзасидан фикрлар билдирилган.

Миллий комиссия аъзолари бугунги кунда мамлакатда Бандлик ва меҳнат муносабатлари вазирлиги томонидан фуқароларни чет элда расмий ишга жойлаштириш ишлари яхши йўлга қўйилмаганлигини, бунинг оқибатида чет элга мустақил равишда иш қидириб чиққан ўзбекистонликлар мураккаб вазиятларга тушиб қолаётганлигини қайд этган.

Миллий комиссия бундай салбий ҳолатларнинг олдини олиш мақсадида бу борадаги муаммоларни ўрганиш ва бартараф этиш учун ишчи гуруҳ тузишни мақсадга мувофиқ деб топган.

Шунингдек, ҳозирги вақтда республикада пахта терими мавсуми бошланган даврда мажбурий меҳнатнинг олдини олишга қаратилган саъй-ҳаракатлар олиб борилаётганига қарамасдан, жойларда бу борада хато ва камчиликлар кузатилаётгани ҳам таъкидланган.

Мавзуга доир: