Президент Шавкат Мирзиёев Тошкентда янгидан ишга тушган Тошкент чинни заводи фаолиятига доир тавсиялар берди. Бу ҳақда Президент матбуот хизмати хабар бермоқда.
Шавкат Мирзиёев Тошкент чинни заводининг қайта тикланиши ҳақида 2018 йил июнь ойида Олмазор аҳолиси билан бўлган мулоқот чоғида маълум қилган эди. Қайд этишларича, 87 миллиард сўм эвазига қайтадан ишга туширилган заводда йилига 30 миллион дона ошхона идишлари, сувенирлар, биноларнинг ички безаклари ишлаб чиқарилиши режалаштирилган.
«Бу завод — Ўзбекистоннинг фахри. Илгари республикамизга меҳмон келса ёки юртдошларимиз чет элга борса, шу завод тўпламларидан совға қилинарди. Энди ушбу янги корхона ундан ҳам чиройли, сифатли ва қадрли маҳсулотлар тайёрлаши керак», — деди Шавкат Мирзиёев.«Мамлакатимизда шунча уйлар қуриляпти, одамларнинг ҳаёт сифати ўзгаряпти. Янги уйга кўчган ҳар бир оила албатта чинни буюмлар сотиб олади. Юбилейлар, фестивалларга бағишланган, совға учун тўпламлар ҳам чиқариш мумкин. Бунинг учун дизайн устида ишлаш, бозор талабини ўрганиб, олимлар ва технологлар билан ҳамкорликда замонавий маҳсулотлар тайёрлаш, янги брендлар яратиш керак. Масалан, миллий нақшларимиз, сўзаналаримиз бу борада катта манба бўла олади», — деб қўшимча қилган Президент.
Аввалроқ Президент Олмазор туманида қурилиши давом этаётган Olmazor Business City ишбилармонлик марказини бориб кўргани ҳақида хабар берилган эди. Бу ерда, хусусан, 2 100 хонадонга мўлжалланган 28 та кўп қаватли уй қурилмоқда. Давлат раҳбари уйларнинг сонини кўпайтириш ҳисобидан нархини пасайтириш зарурлиги ҳақида гапирган эди.
Изоҳ (0)