АҚШнинг Тошкентдаги элчихонаси консуллик бўлими вакиллари юзга яқин тингловчилар билан Green Card масаласида учрашди. Учрашув Ўзбекистон миллий кутубхонаси биносида бўлиб ўтди. Green Card тўлдириш мавсуми очилиши муносабати билан ташкил этилган тадбирда «Дарё» мухбири иштирок этди.
Учрашувнинг биринчи қисмида мавзу юзасидан презентация қилинди; шундан сўнг консуллик болими ходимлари йиғилганларнинг саволларга жавоб берди.
«Умумий ҳисобда 55 минг кишини саралаб олиш белгиланди. Бу кўрсаткич давлатлар кесимида белгиланмаган», – деди вакиллардан бири, жорий йилда Green Card’га қанча одам эга чиқиши борасидаги саволга жавоб бераркан.
Шунингдек, учрашувда номзодга қўйиладиган талаблар ҳам санаб ўтилди. Унга кўра, номзод 21 ёшга тўлган ҳамда ўрта маълумотга эга бўлиши лозим.
Иштирокчиларга бошқа талаб қўйилмайди.
Анкета қандай тўлдирилади?
Анкета тўлдириш фақат бир манзил – Green Card’нинг расмий саҳифаси бўлмиш «DVLottery.state.gov» орқали амалга оширилади. Бугунги кунга ўйиннинг расмий саҳифаси бўлишга «даъвогар» ўнлаб сохта сайтлар бор ва улар кўплаб фойдаланувчиларига ҳам эга. Бу, албатта, иштирокчиларни чалғитади.«Улар сиздан анкета тўлдириш давомида пул талаб қилиши мумкин. Унутмаслик керакки, ўйиннинг дастлабки босқичи, яъни ариза топшириш мутлақо бепул. Сайтга кириб, шахсий ва оилавий маълумотлар, расм киритиш кифоя ва сиз рўйхатдан ўтасиз. Янги низомга кўра, паспорт маълумотларингизни ҳам киритишингиз керак», – деди расмийлардан бири бу масалада.
Қандай қатъий талаблар бор?
Аввало исм-фамилия киритиш жараёнида камчиликка йўл қўйилмаслиги лозим. Инглизча муқобили билан таққослаганда фарқ юзага келувчи исм-фамилияли талабгорлардан айниқса эътиборли бўлиш сўралади. Одатий яшил паспорт ёрдамида рўйхатдан ўтмоқчи бўлганлар паспортнинг маълумотлар инглиз тилида берилган қисмидан фойдаланиши лозим. Шундагина исм-фамилия масаласида муаммо бўлмайди. Аммо баъзи сабабларга кўра жорий йилда яшил паспорт билан рўйхатдан ўтиш тавсия этилмайди.Регистрация қизил паспорт орқали амалга оширилгудек бўлса, у ҳолда муаммо кузатилмайди.
Иккинчи қатъий талаб суратга қўйилади. Консуллик суратларнинг ҳақиқийлигига катта эътибор қаратади. Олти ойдан кўп бўлмаган муддатда тушилган ва ҳеч қандай таҳрир амалга оширилмаган сурат тақдим этилиши керак. Суратга оқ фонда тушиш тавсия этилади. Photoshop дастурларида ҳаттоки оқ фонни тузатиш ҳам мумкин эмас. Расм 100 фоиз ҳақиқий бўлиши керак. Ҳақиқий бўлмаган сурат эгасининг мурожаати сўзсиз рад этилади.
Қўшимча маълумот сифатида айтиш керакки, бир киши бир мавсумда фақат бир марта рўйхатдан ўтиши мумкин.
Қизил паспорт билан рўйхатдан ўтганларнинг имконияти кўпаядими?
Жорий йилдан бошлаб элчихона рўйхатдан ўтишда фақат қизил паспортлардан фойдаланишни тавсия этмоқда.Албатта, техник жиҳатдан яшил паспорт билан ҳам рўйхатдан ўтиш имконияти бор, агарда унда муддати тугамаган ОВИР стикери бўлса. Қизил паспорт орқали рўйхатдан ўтиш тавсия қилиниши кейинги босқичлар билан боғлиқ. Биринчидан, ОВИР стикерлари берилиши тўхтатилди, иккинчидан эса, жорий йилги лотерея натижалари чиқадиган 2021 йилга қадар яшил паспорт муомаладан чиқарилиши мумкин. Бу эса муаммо келтириб чиқаради.
Рўйхатдан ўтишда ишлатиладиган паспорт тўлақонли чет элга чиқиш ҳужжати бўлиши керак.
Маълумот ўрнида, агар рўйхатдан ўтилганидан сўнг паспорт маълумотлари ўзгартирилса, консулликка янгиланган шахсий маълумотларни тақдим этиш ва маълумот ўзгарганининг сабабини изоҳлаб ва асослаб бериш керак бўлади. Шу сабабдан паспорт маълумотларни ўзгартириш тавсия этилмайди.
Талабгор ОТМ талабаси бўлса…
Ҳужжат топшириш даврида талабгор ОТМ талабаси бўлса, анкета тўлдиришда ўзини ўрта маълумотли сифатида қайд этади. Агар у иккинчи босқичга ўтса ва бу даврга келиб ОТМни тамомлаган бўлса, бу маълумотни суҳбат жараёнида тақдим этиши мумкин. Ўрта маълумотга эга бўлмаган ва икки йиллик иш стажига эга талабгорлар учун сайтда маълумот берилган.Ўйин натижаларини аниқлаш қандай тартибда амалга оширилади?
Рўйхатдан ўтиш якунланганда иштирокчига тасдиқ коди тақдим этилади. Агар у қандайдир хизмат кўрсатиш шохобчасида ёки кимнингдир кўмаги билан ариза топширган бўлса, тасдиқ коди фақат ўзига маълум эканлигига ишонч ҳосил қилиш лозим. Акс ҳолда муаммолар бўлиши мумкин.Ўйинда ютишда кўмак таклиф қилган ҳеч кимга ишонманг. Ўйин натижалари эълон қилингач сиз ўзингизга тегишли тасдиқ кодини сайтга киритасиз ва натижани билиб оласиз. Натижа ҳеч қандай жадвал кўринишида ёки бошқа сайтда эълон қилинмайди. Ҳар ким ўз натижасини фақат ўзи текшириш имкониятига эга.
Қайси жараён пулли?
Регистрация жараёни, юқорида таъкидланганидек, текин. Биринчи босқичдан ўтсангиз, виза харажатлари ва тиббий хулосалар учун сиздан маблағ ажратиш талаб этилади.Яна бир эслатма: электрон почтангизга фирибгарлар томонидан «Сиз Green Card ютдингиз» мазмунидаги хабарлар келиши мумкин. Консуллик почта орқали ҳеч қачон хабар юбормайди. Натижалар фақат расмий сайтда эълон қилинади.
Изоҳ (0)