Барби қўғирчоқлари ишлаб чиқарувчи Mattel компанияси янги гендер-нейтрал қўғирчоқларни сотувга чиқарди. Тўплам «Яратувчан олам» (Creatable World) номини олди. Бу ҳақда TJournal хабар берди.

Фото: TJournal

Тўпламга турли ирқ, тана ва бўй узунлигига эга олтита қўғирчоқ киритилди. Уларга турли кийим, парик ва оёқ кийим танлаш мумкин. Бу эса қўғирчоқларнинг жинси ва имижини ўзгартириш имконини беради.

«Янги моделларнинг ўзига хос жиҳати шундаки уларнинг образи гендер меъёрлари билан белгиланмаган», — дейилади хабарда.

Компания болаларнинг истакларини ўрганиб чиқди. Тадқиқотларга кўра, ўсмирлар гендер йўналтирилган ўйинчоқларни сотиб олишни хоҳламайди.

Аввалроқ, барби қўғирчоқларини ишлаб чиқарувчи Mattel компанияси янги гендер-нейтрал қўғирчоқлар чиқариши ҳақида хабар берилганди. Компания янги ўйинчоқлар алоҳида бренд бўлиб, барби қўғирчоқларига алоқаси йўқлигини маълум қилган.

Mattel ходими Ким Калмоуннинг айтишича, янги қўғирчоқлар линияси ёрдамида компания ўйинчоқларни ёрлиқлардан ҳоли қилишни хоҳлайди.

Мавзуга доир: Mattel компанияси гендер-нейтрал Барби қўғирчоқларини сотувга чиқармоқчи