Чеченистоннинг Шали шаҳрида Европадаги энг йирик масжиднинг тантанали очилгани ҳақида хабар берилганди. Масжид ичида 30 минг киши, атрофида эса 70 минг мусулмон ибодат қила олади. Маросимда Чеченистон раҳбари Рамзан Қодиров масжид Муҳаммад Пайғамбар номи билан аталиши ҳақида эълон қилди, деб хабар беради «Халқ сўзи Online».

Фото: «Халқ сўзи Online»

Ушбу масжид қурилиши 2012 йил бошланган. Дастлаб 10 минг намозхонга мўлжалланган масжидни 2015 йилда очиш режалаштирилган эди. Бироқ кейинроқ қурилиш режасига ўзгартириш киритилган, уни фойдаланишга топшириш муддати ҳам узайтирилган.

Хабарга кўра янги масжид «Шали-сити» мажмуаси таркибига киради. Бу мажмуада Шали шаҳри учун хос бўлмаган олтита кўп қаватли турар-жой бинолари ҳам жойлашган. Бинолар 12 ва 16 қаватга эга. Шунингдек, мажмуада қўриқлаш минораси шаклидаги 21 қаватли бино ҳам бор, унинг ичида ресторан, офислар ва меҳмонхона жойлашган.

2017 йил янги мажмуа барпо этилаётган ҳудуд атрофидаги юзга яқин уй бузиб ташланган, бу ерда мажмуага элтувчи махсус йўл барпо этилган. 2018 йил Шалидаги уйлари бузилган 92 оилага янги уйлардан иборат шаҳарча қуриб берилган.

Фото: «Халқ сўзи Online»

Европадаги энг йирик масжид Самарқанд ва Бухоро мумтоз меъморчилиги услубида ўзбек меъморлари томонидан барпо этилди. Бош архитектор Абдуқаҳҳор Турдиевнинг айтишича, Чеченистон президенти Рамзан Қодиров таклиф ва мулоҳазалари асосида лойиҳага ўзгартиришлар киритилган.

«Қурилишда фойдаланилган оқ мармар фақат Грециянинг Тасос оролидан қазиб олинади. Қоялардан кесиб олинган улкан бўлакларни қайта ишлаш учун материкка юборилади. Завод шароитида эса мармарга зарур шакл берилади», — дея тушунтиради бош архитектор.

Масжиднинг асосий хонасида лотос шаклидаги саккиз метрли, оғирлиги уч тоннали қандил ўрнатилган. Чеченистон президентининг масжид қурилишини назорат қилган маслаҳатчиси Амрудди Эдилгириевнинг сўзларига кўра, ушбу қандил махсус буюртма бўйича Туркияда ясалган. У 400 та чироқ Swаrоvski биллурлари ва олтин билан безатилган.

Масжид атрофида ҳар хил турдаги қарийб 2000 дарахт, 28 хил атиргул ўтқазилган. Масжид барпо этилишига қанча маблағ сарфлангани маълум эмас.

Фото: «Халқ сўзи Online»

Масжиднинг очилишига ўзбекистонлик бир гуруҳ ошпазлар ўзбекча палов тайёрлаб, маҳаллий аҳоли ва меҳмонларга тортиқ қилишлари режа қилинган.

Жами 43 мамлакатдан 150 олиймақом меҳмонлар, шу жумладан, Ўзбекистон Мусулмонлари идораси раҳбари, муфтий Усмонхон Алимов ҳам маросимда қатнашгани хабар қилинди.

Шу куни Шали шаҳрида Қуръон ҳофизлари мактаби ҳам очилган.