Каримов Фонди бошчилигида Ўзбекистоннинг Биринчи Президенти Ислом Каримов ҳақидаги навбатдаги роман нашр этилди.  Фонд матбуот хизматида маълум қилинишича, асар «Олов тутган одам» деб номланиб, ёзувчи Луқмон Бўрихон томонидан ёзилган.

Фото: Каримов Фонди

Унда Ислом Каримов Қашқадарё вилоят компартияси биринчи котиби вазифасида ишлаган вақтдан бошлаб ЎзССР компартияси Марказий Қўмитасининг биринчи котиби лавозимига тайинлангунга қадар бўлган давр ёзилган.

Фото: Каримов Фонди

Ислом Каримов 1986 йили иқтисодий ва ижтимоий жабҳада энг қолоқ ҳудудлардан бирига айланиб қолган Қашқадарёга юборилади. Давлат раҳбари олдида мушкул вазифа турар эди: у одамлардаги тушкун кайфиятга барҳам бериши, халқнинг ишончини қозониб, уларда ёруғ кунларга умид уйғотиши лозим эди.

Ўша кезлар Марказда Қашқадарё ва Бухоро вилоятларини бирлаштириш таклифи қизғин муҳокама этилаётганди. Айнан Ислом Каримовнинг қатъий саъй-ҳаракатлари билан Қашқадарё алоҳида вилоят сифатида сақлаб қолинди.

Фото: Каримов Фонди

Халқнинг вилоят раҳбариятига ишончи аста-секин ўсиб борди. Қолаверса, Қашқадарёнинг хўжалик-иқтисодий кўрсаткичлари яхшилана бошлади. Шу тариқа Ислом Каримовнинг етакчи ва хўжалик бошқарувчиси сифатидаги нуфузи ҳам мустаҳкамланди. Бу эса унинг республика раҳбари этиб тайинланишида ҳал қилувчи аҳамият касб этди.

«Олов тутган одам» романида шу каби воқеалар батафсил тасвирланган. Муаллиф Луқмон Бўрихон асар устида ишлаш жараёнида турли ҳужжатларни, тарихий манбаларни ўрганган, шунингдек, қаламга олинган ҳодисаларнинг шоҳиди бўлган қашқадарёликлар билан кўп бора учрашиб суҳбатлашган.