Жорий йил 14—16 сентябрь кунлари Хивадаги «Ичан қалъа» музей-қўриқхонаси ҳудудида «Рақс сеҳри» халқаро фестивали ўтказилади. Бу ҳақда «Дарё»га Хоразм вилояти туризмни ривожлантириш департаменти матбуот хизмати маълум қилди.
Фото: Хоразм вилояти туризмни ривожлантириш департаменти
«Рақс сеҳри» халқаро фестивали миллий рақс санъатини кенг тарғиб қилиш ва арт-туризмни янада ривожлантириш мақсадида ҳар йили анъанавий тарзда ташкил этиб келинмоқда.
Бу йилги «Рақс сеҳри» халқаро фестивалида 20 дан ортиқ хорижий давлат, шунингдек, Ўзбекистоннинг барча ҳудудларидан келган рақс жамоалари, санъаткорлар, олим ва тадқиқотчилар қатнашади.
Шунингдек, фестиваль доирасида рақс усталарининг маҳорат сабоқлари, ижодий учрашувлар, фольклор ансабллари чиқишлари, анимацион шоулар, саҳналаштирилган ва қўғирчоқ театрлари томошалари, ҳунармандлар, тасвирий ва амалий санъат, миллий таомлар ва либослар кўргазмалари ҳамда «Ўзбекистон рақс санъати тарихи» фотокўргазмаси ташкил этилади.
