Оқдарё туманидаги «Оқдарё», «Пичоқчи», «Олчинтепа» ва «З.М.Бобур» маҳалла фуқаролар йиғини ҳудудлари бўйича ҳарбий ҳисобга олиш мутахассиси вазифасида ишлаб келган Ҳусниёр Тилавов ўзгаларга Мудофаа ишлари бўлими хизматчиси сифатида резервчилар ва ҳарбий хизматга мажбурларни хизматга чақирилиш муддатини кейинга қолдирувчи шахс сифатида намоён қилиб келган.
Ҳусниёр Тилавов 2019 йилнинг 15 март куни олдиндан таниш бўлган фуқаро А.Н.нинг ишончига кириб, унга туман Мудофаа ишлари бўлими сафарбарлик чақирув резерви бўлинмасининг ҳарбий хизматчи ходимлари билан яқин алоқада эканлигини билдирган.
Ҳусниёр Тилавов А.Н.ни сафарбарлик чақирувидаги хизматга чақирилиш муддатини кейинги йилга қолдиришга ишонтирган. Бунинг учун Оқдарё тумани Мудофаа ишлари бўлимининг мансабдор шахсларига 100 АҚШ доллари миқдорида пулларни пора тариқасида беришлигини айтиб, уни пора беришга қизиқтирган. 27 март куни Ҳусниёр Тилавов шахсий бойлик орттириш, алдаш ва ишончни суиистеъмол қилиш йўли билан А.Н.ни сафарбарлик чақирувидаги хизматга чақирилиш муддатини кейинги йилга қолдириш эвазига 100 АҚШ доллари миқдоридаги пулларни фирибгарлик йўли билан қўлга киритган вақтда, Иқтисодий жиноятларга қарши курашиш департаменти вилоят бошқармаси ва туман бўлими ходимлари томонидан ўтказилган тезкор тадбир давомида қўлга олинган.
Жиноят ишлари бўйича Оқдарё тумани судининг Мажбурий ижро бюроси Оқдарё тумани бўлимида бўлиб ўтган сайёр суд мажлисида Ҳусниёр Тилавов ўз айбига тўлиқ иқрорлик билдириб баён қилган кўргазмасидан ташқари, унинг айби суд мажлисида сўроқ қилинган гувоҳларнинг кўрсатмалари билан ҳам тўлиқ исботланди.
Жиноят ишлари бўйича Оқдарё тумани суди раиси Илёс Дониёровнинг «Дарё»га маълум қилишича, судланувчи Ҳусниёр Тилавов Ўзбекистон Республикаси Жиноят Кодексининг 25, 168-моддасининг (Фирибгарлик) 1-қисми ва 28, 211-моддасининг (Пора бериш) 1-қисми билан айбли деб топилиб, ҳар ойда иш ҳақининг 15 фоизи миқдорида давлат даромади ҳисобига ушлаб қолган ҳолда 3 йил 6 ойга озодликни чеклаш жазоси тайинланди.
Изоҳ (0)