18 август куни Қарши шаҳрида вилоят ИИБ Йўл ҳаракати хавфсизлиги бошқармаси инспекторлари томонидан ўтказилган тадбирда 15 та автомобиль ноқонуний тонировка ўрнатгани аниқланди ва жарима майдонига жойлаштирилди. Бу ҳақда «Дарё»га вилоят Йўл ҳаракати хавфсизлиги бошқармаси матбуот хизмати раҳбари Жавлон Бахтиев хабар бермоқда.
Мазкур тадбир Вазирлар Маҳкамаси томонидан тонировкага расман рухсат берилгандан сўнг амалга оширилаётган дастлабки назорат тадбири ҳисобланади.
— Тонировка учун рухсат олган автомобилларнинг 313 таси орқа ён ойналар тусини ўзгартириш учун 2 миллион 230 минг сўм давлат божи тўлаган бўлса, 41 нафар юртдошимиз барча ён ойналар тусини ўзгартириш учун талаб қилинадиган 11 миллион 150 минг сўм пул тўлаб, 2-тоифани маъқул кўрган, — дейди Жавлон Бахтиев. — Минг таассуфки, ҳеч қандай давлат божи тўловини амалга оширмасдан ўзбошимчалик билан тонировка ўрнатаётган ҳайдовчиларимиз ҳам кўпчиликни ташкил этмоқда. Қарши шаҳрида бўлиб ўтган бир кунлик тадбирда 15 нафар ноқонуний тонировка ўрнатган ҳайдовчи аниқлангани ҳам буни исботлаб турибди.
Йўл ҳаракати хавфсизлиги бошқармаси матбуот хизматининг маълумот беришича, айни кунга қадар вилоятда 354 та автомобилга тонировка учун рухсат берилган. Тонировка учун расман рухсат берилган автомобилларнинг 298 таси жисмоний шахсларга тегишли бўлса, 56 та автомобиль юридик шахслар автомобили ҳисобланади.
Эслатиб ўтамиз, махсус рухсатномасиз машина ойналарини тонировка қилган ҳамда ҳайдовчининг ўрнидан теварак-атрофни кўришни чеклайдиган қўшимча нарсалар ўрнатилган (масалан, орқа ён ойналарга пардалар) бўлса, жарима жазоси ЭКИҲнинг 25 баробари (5 миллион 575 минг сўм) этиб белгиланган.
Изоҳ (0)