Танзила Норбоева Корея Республикаси Миллий Ассамблеяси спикери билан учрашди
Хабар берганимиздек, Ўзбекистон Республикаси Олий Мажлиси Сенати раиси Танзила Норбоева бошчилигидаги делегация айни кунларда Корея Республикасида бўлиб турибди. Бу ҳақда «Дарё»га журналист Жонибек Маърупов маълум қилди.
Ўзбекистон Республикаси парламенти делегацияси аъзолари 6—9 август кунлари Корея Республикасига расмий ташрифи доирасида Олий Мажлис Сенати раиси Танзила Норбоева Корея Республикаси Миллий Ассамблеяси спикери Мун Хи Санг билан учрашди. Сенат Ахборот хизматининг хабар беришича, учрашувда Ўзбекистон билан Кореянинг парламентлараро алоқалари истиқболлари ва парламент аъзолари ҳамкорлигини кенгайтириш масалалари муҳокама этилди.
Хусусан, Ўзбекистон Республикаси Президенти Шавкат Мирзиёев ҳамда Корея Республикаси президенти Мун Дже Иннинг сиёсий иродаси ва қатъияти туфайли Ўзбекистон—Корея муносабатлари стратегик шериклик даражасига кўтарилди. Икки томонлама сиёсий, иқтисодий, маданий-гуманитар алоқалар суръати тобора ошиб бормоқда. Бу эса иккала давлат манфаатларига тўлиқ жавоб беради, дўстлик ва ҳамкорлик мустаҳкамланишига хизмат қилади.
Шу муносабат билан парламентлараро мулоқот мамлакатлар ўртасидаги ҳамкорликнинг муҳим хусусиятларидан бири ҳисобланади. Шу боис, томонлар олий даражадаги учрашувлар доирасида эришилган келишувларни рўёбга чиқариш учун икки давлат парламентлари ҳамкорлигинининг асосий вазифаси эканини таъкидлади.
