Африка Миллатлар Кубоги. Тунис Малини юта олмади, Марокаш ва ЖAРда эса ғалаба (видео)

Футбол бўйича Африка Миллатлар Кубогининг гуруҳларида 28 июнь, жума куни 2-тури доирасида 3 та беллашув бўлиб ўтди.

Куннинг дастлабки ўйинида Тунис терма жамоаси Мали термасига қарши майдонга тушди.

Учрашувнинг 60-дақиқасида малилик ярим ҳимоайчи Диаде Самассеку ҳисобни очган бўлса, орадан 10 дақиқа ўтиб Тунис вакили Ваҳби Ҳазри ҳисобни тенглаштирди (1:1).

Шу тариқа Тунис мусобақанинг 2-турида Мали билан 1:1 ҳисобида дурнаг ўйнади.

Мазкур ўйин якунига кўра, Мали терма жамоаси 4 очко тўплаган ҳолда «E» гуруҳида етакчиликни ўз қўлига олди. 2-ўринда бораётган Тунис ҳисобида эса 2 очко мавжуд.

Шу куни Марокаш термаси Кот-д’Ивуар билан баҳсга киришди.

Баҳсдаги ягона голга марокашлик ҳужумчи Юссуф ан-Носири (23) муаллифлик қилди (1:0).

Шу тариқа марокашликлар Кот-д’Ивуарни кичик ҳисобда мағлубиятга учратиб, плей-офф йўлланмасини муддатидан аввал нақд қилди.

Қайд этиш лозим, Марокаш «D» гуруҳида 6 очко жамғариб биринчи ўринга кўтарилиб олди. Ундан кейинги ўринда бораётган Кот-д’Ивуарда эса 3 очко мавжуд.

Куннинг сўнгги учрашувида ЖAР терма жамоаси Намибия билан беллашди.

Ўйиннинг 68-дақиқасида ЖAР ярим ҳимоячиси Бонгани Зунгу рақиб дарвозасини ишғол қилди (1:0).

Учрашув якунига кўра, ЖAР термаси Намибияни 1:0 ҳисобида мағлуб этди.

Ушбу ғалабадан сўнг ЖAР очколари сонини 3 тага етказиб олди ва гуруҳ жадвалида 3-ўринни эгаллаб турибди. Охирги ўриндан жой олган Намибия ҳисобида эса очко мавжуд эмас.