Мадриднинг «Реал» ҳамда Лондоннинг «Челси» клубларининг яқин ўтмишдаги юлдузлари ўртасида Мадридда хайрия учрашуви, 23 июнь, якшанба куни ўтказилди.
Сўнгги 10 йилдан бери Мадридда футбол афсоналари ўртасида хайрия учрашувлари ўтказиб келинади. Ҳар йили «Реал» афсоналарига қарши Европанинг гранд клублари, хусусан, 2019 йилгача «Миилан», «Бавария», «Манчестер Юнайтед», «Ювентус», «Интер», «Ливерпуль», «Аякс», «Рома» ва «Арсенал» клублари рақиблик қилди.
«Реал» ва «Челси» афсоналари ўртасидаги тўқнашувнинг шиори эса қуйидагича бўлди: «Қалб туғёни». Мазкур ўйиндан тушган барча маблағ «Реал»нинг ижтимоий лойиҳалари учун йўналтирилади. Жумладан, маблағнинг маълум қисми адолатсизлик ва тенгсизликдан жабр кўрган болаларга улашилади.
Бу сафарги учрашувнинг чипталари 5 евродан қилиб белгиланганди. «Сантьяго Бернабеу» эса худди катта ўйинлардаги каби мухлислар билан тўлди.
Ўйиндагаи номлар ҳам чакана бўлмади: Кудичини, Галлас, Десайи, Пойет, Малуда, Шевченко, Зола, Туре Андре Флу кўк либосда, Амависка, Карамбё, Жулио Баптиста, Морьентес, Рауль, Иван Кампо оқ либосда саф тортди. Клод Макалеле ва Рикардо Карвальo эса ҳар икки клуб сафида бир таймдан ҳаракат қилди.
Учрашувда ҳисоб 11-дақиқага келиб ҳисоб очилди, гол муаллифи «Реал» афсонаси Рауль. Орадан 3 дақиқа ўтар-ўтмас чиройли комбинациядан сўнг Фернандо Морьентес таблодаги ҳисобни 2:0 ҳолатига келтирди. Учрашувнинг 19-дақиқасига келиб, ҳисоб йириклашди. Амависканинг қанотдан узатган тўпини яна ўша Морьентес бош билан дарвозага жойлаб қўйди — 3:0.
Шундан сўнг «Челси» афсоналари «уйғонди». 23-дақиқада Шевченко пенальтидан гол урган бўлса, орадан бир дақиқа ҳам ўтмасдан Пойет бош билан ҳисобни қисқартирди. 1-бўлимдаги сўнгги гол 34-дақиқада Карамбё ҳисобига ёзилди. Унинг узоқдан йўллаган зарбасини қайтаришда «аристоклатлар» дарвозабони ожиз қолди.
Иккинчи бўлимнинг 55-дақиқасида «Челси» вакили Уильям Галлас тўпурарлардан кам эмаслигини исботлаб, ҳисобни 4:3 ҳисобига келтирди. 60-дақиқада Раулнинг пенальтидан дублни расмийлаштирган бўлса, Флоран Малуда 70-дақиқада ўйиндаги сўнгги голга муаллифлик қилди.
Қайд этиш жоиз, «Қироллик клуби» мазкур хайрия ўйинлар доирасида «Бернабеу»да кетма-кет 10 та ўйиндан бери мағлуб бўлмади. Мадридликлар 9 та ўйинда ғалаба қозонган бўлса, 1 та ўйинда дуранг қайд этди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)