22 июнь куни соат тахминан 15:30 да Балиқчи туманидаги «Шонли Полвонкўл» фермер хўжалиги ҳайдовчиси, Ғ.М. хўжалик тасарруфида бўлган New Holland TL русумли тракторга ёқилғи қуйиш вақтида куйиб тан жароҳати олган ва шифохонага ётқизилган. Бу ҳақда «Дарё»га вилоят Фавқулодда вазиятлар бошқармаси Ёнғин хавфсизлиги бошқармаси матбуот хизмати хабар бермоқда.
Ҳозирда Ғ.М.нинг ҳолати ўртача бўлиб, республика шошилинч тез тиббий ёрдам илмий маркази Андижон филиали куйиклар бўлимида шифокорлар назорати остида муолажаларни давом эттирмоқда.
Мазкур ҳолат юзасидан олиб борилган дастлабки терговга қадар текширув ишлари давомида, фуқаро тракторга ёқилғи қуйиш вақтида, тракторнинг ёқилғи сиғими ва темир челакдан ҳосил бўлган статик электр заряди оқибатида куйиб тан жароҳати олганлиги маълум бўлди.
Ҳозирда воқеа жойига мутахассислар жалб қилиниб, куйиш сабаблари юзасидан суриштирув ишлари давом эттирилмоқда.
Бошқарма матбуот хизмати ходими Азизбек Ёрқуловнинг маълум қилишича, худди шу каби ҳолат шу йилнинг 29 май куни айнан Балиқчи туманида «Аралхон» фермер хўжалиги тракторчиси М.Т. билан ҳам содир бўлган.
Бу каби бахтсиз ҳодисаларнинг олдини олиш мақсадида вилоят ЁХБ фуқаролардан автомашина ва бошқа техникаларга ёқилғини шохобчада, яшин қайтаргич ва статик электр зарядининг олдини оладиган махсус шланглар ёрдамида амалга оширишни тавсия қилади ва техникаларга ёқилғини қўлда қуйиш юқорида келтириб ўтилган оқибатларга олиб келиши мумкинлиги бўйича огоҳлантиради.
Изоҳ (0)