Германия канцлери Ангела Меркелнинг самолёти Дортмунд аэропортида автомобиль билан тўқнашиб кетди, деб хабар беради Bild нашри.
Ичида ҳайдовчиси бўлмаган Renault Trafic тураргоҳдаги Bombardier Global 5000 ҳукумат самолётига бориб урилган. Нохуш ҳодиса оқибатида самолёт шикастланган. Тўқнашув вақтида Меркель ҳаво кемаси бортида бўлмаган. Самолётнинг уч нафар экипажига ҳам ҳеч қандай зарар етмагани айтилмоқда.
Етказилган зарарнинг аниқ миқдори маълум эмас. Бундесвер техниклари самолётни таъмирлашга тушиб кетган. Ҳозирда автомобиль қандай қилиб ҳаракатга келиб қолгани текширилмоқда.
Нашрнинг бундесвердаги манбасига таяниб маълум қилишича, ҳайдовчи қўл тормозини тортишни унутиб қолдирган. Германия канцлери Берлинга вертолётда қайтиши кутилмоқда.
Изоҳ (0)