Тошкент Ботаника боғида Хотира ва Қадрлаш кунига бағишланган байрам тадбири бўлиб ўтди. Унда Шавкат Мирзиёев иштирок этди. Бу ҳақда Президент матбуот хизмати маълум қилди.

Фото: Президент матбуот хизмати

Давлат раҳбари байрам тадбирига келган уруш ва меҳнат фахрийларининг ҳар бири билан алоҳида саломлашиб, ҳол-аҳвол сўради. Уларга сиҳат-саломатлик, узоқ умр тилади. Нуронийлар юртга тинчлик-осойишталик, халқимизга фаровонлик тилаб дуолар қилди.

Фото: Президент матбуот хизмати

Боғда Иккинчи жаҳон уруши вақтидаги композициялар инсталляцияси акс эттирилган. Поезд ва ҳарбий техникалар намойиш қилинган.

Фото: Президент матбуот хизмати

Рамзий саҳнада машҳур ўзбек генерали Собир Раҳимов қўмондонлигидаги дивизиянинг қаҳрамонлиги акс эттирилди. Президент фахрийлар билан бирга уни томоша қилди.

Фото: Президент матбуот хизмати

Инсоният тарихидаги энг даҳшатли бу урушда Ўзбекистондан 1,5 миллиондан ортиқ одам қатнашган. Бутун халқ тинимсиз меҳнат қилиб, жанг майдонларига ҳарбий техника ва қурол-яроқ, кийим-кечак, озиқ-овқат етказиб турган. Уруш ҳудудларидан кўчириб келтирилган 1 миллионга яқин инсонга бошпана бериб, ўз ризқини баҳам кўрган.

Байрам тадбирида мамлакатнинг барча ҳудудларидан келган уруш ва меҳнат фахрийлари иштирок этди.

Фото: Президент матбуот хизмати

Шавкат Мирзиёев Хотира ва Қадрлаш куни ҳамда Ғалабанинг 74 йиллиги билан барча фахрийларни, бутун халқимизни табриклади.

Фото: Президент матбуот хизмати

Кексаларга, мўътабар фахрийларга юксак эътибор ва ғамхўрлик кўрсатиш давлатимиз сиёсатининг устувор йўналиши экани таъкидланди.

Фото: Президент матбуот хизмати

Байрам тадбирида Қуролли Кучлар Марказий ашула ва рақс ансамбли, фолклор жамоалар, эстрада хонандалари ижросида куй-қўшиқлар янгради.

Фото: Президент матбуот хизмати

Бундай тадбирлар мамлакатнинг барча ҳудудларида бўлиб ўтмоқда.

Фото: Президент матбуот хизмати