Шри-Ланка хорижий элчилардан мамлакатга саёҳат қилиш чекловларини бекор қилишга чақирди

Шри-Ланка Президенти Майтрипала Siriсена хорижий дипломатик вакилларни Шри-Ланкада миллий хавфсизлик қайта тикланганидан буён ўз фуқаролари учун мамлакатга саёҳат қилиш чекловларини бекор қилишга чақирди, деб хабар берди «РИА Новости»

Қайд этилишича, президент дипломатларга мамлакатдаги террористик фаолиятга қарши хавфсизлик кучларининг операцияларида эришилган ютуқлар ҳақида маълумот берди.

Президент барча террорчиларнинг 95 фоизи ҳибсга олинган ёки назорат остида эканлигини ҳамда фақат икки ёки уч нафар гумондорни ҳибсга олиш ишлари давом этаётганини айтиб ўтди.

Siriсена хорижий разведка ёрдами билан терроризм таҳдиди яқин орада йўқ қилинишига ишонч билдирди.

Аввалроқ Шри-Ланка полицияси бошлиғи 21 апрелда содир этилган терактга алоқадор барча шахслар ва  гумонланувчилар қўлга олингани ёки йўқ қилинганини маълум қилди.

21 апрель куни Шри-Ланкадаги саккизта черков ва меҳмонхоналарда «Пасха» байрамини нишонлаш вақтида портлаш содир бўлганди. Оқибатда 250 киши ҳалок бўлган, 480 дан ортиқ одам жароҳат олган. Полиция 40 нафар гумонланувчини қўлга олган эди. Шри-Ланкадаги теракт бўйича масъулиятни ИШИД ўз зиммасига олган. Шри-Ланка ҳукумати ушбу терактларни Янги Зеландиядаги масжидга амалга оширилган ҳужум учун қасос деб баҳоламоқда.

23 апрель куни Шри-Ланка президенти Майтрипала Siriсена мамлакатдаги хавфсизликка жавоб берадиган барча идора раҳбарларини ишдан бўшатишни маълум қилганди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.