Ўзбекистон Республикаси Олий Мажлиси Сенатининг ўн тўққизинчи ялпи мажлисида нутқ сўзлаган Сенат раиси Ниғматилла Йўлдошев сенаторлар эътиборини Тошкент вилоятидаги мавжуд бўлган муаммоларга қаратдиб деб хабар берди «Дарё» мухбири Севара Нишонова.
«Давлатимиз раҳбарининг 2018 йилнинг январида вилоятга амалга оширган ташрифлари давомида вазирликлар, идоралар, хўжалик бошқаруви органлари ва тижорат банкларининг Тошкент вилоят бошқармалари ҳамда ташкилотларини Нурафшон шаҳрига кўчириш вазифаси қўйилган эди. Орадан бир йил-у уч ой вақт ўтганига қарамасдан, фақат вазирлик ва идораларнинг 20 га яқин бошқармалари Нурафшонга кўчирилмаганини қандай изоҳлаш мумкин?
Жойида ўтказган ўрганишларимиз шуни кўрсатдики, айниқса, молия, солиқ, статистика, бандлик ва меҳнат муносабатлари, халқ таълими, соғлиқни сақлаш, ветеринария назорати бошқармалари каби тузилмаларнинг амалда кўчирилмагани:
биринчидан, вилоят ҳокимлиги учун кўплаб қийинчиликлар ва муаммоларни келтириб чиқармоқда;
иккинчидан, мазкур тузилмалар бевосита масъул ва жавобгар бўлган соҳалардаги айнан ҳудудларга хос бўлган, аҳолини ташвишга солаётган муаммоларни ўз вақтида ҳал этишга сунъий тўсиқ бўлмоқда;
учинчидан, бошқарув самарадорлигини ошириш, давлат идораларини халққа яқинлаштириш ишларига бевосита салбий таъсир кўрсатмоқда», — дейди Сенат раиси.
Ниғматилла Йўлдошевнинг қайд этишича, деярли барча вилоятлар, хусусан Тошкент вилоятига ҳам хос бўлган яна бир муаммо аҳоли бандлигини таъминлаш билан бевосита боғлиқдир.
«Бандлик ва меҳнат муносабатлари вазирлиги томонидан бу борадаги муаммоларни комплекс ҳал этиш бўйича таъсирчан чоралар етарли даражада кўрилмаётгани оқибатида вилоятда қарийб 15 800 та иш ўрни бўш турибди.Пойтахт билан туташ бўлган ҳудудда шунча иш ўрнининг бўш турганини мутасаддилар қандай изоҳлайди ?Наҳотки, улар йиллар давомида иш излаб юрган одамларнинг овозини эшитмаётган бўлса?», — дейди Сенат раиси.
Шунингдек, «Аҳолига коммунал хизматлар кўрсатиш, ичимлик суви таъминоти, автомобиль йўллари, соғлиқни сақлаш, таълим ва бошқа ижтимоий соҳалардаги долзарб муаммолар кўламининг бошқа ҳудудларга қараганда пойтахт вилоятида ғоят кенглиги ҳам ташвишланарлидир».
«Биргина мисол: вилоят аҳолисининг 60 фоизи чиқиндиларни тозалаш ва уларни олиб чиқиш бўйича хизматлардан бебаҳра қолмоқда.Вилоятдаги ички автомобиль йўлларининг 65 фоизи, ичимлик суви тармоқларининг 63 фоизи таъмирталаб аҳволга келиб қолгани биринчи навбатда масъул вазирлик ва идоралар учун изоҳ талаб қилинадиган саволлардир.Қайд этиш ўринлики, Ҳукумат қарорлари билан тасдиқланган дастурлар ўз вақтида, тўлиқ ижро этилганида ҳолат мутлақо бошқача бўлиши мумкин эди.Масалан, Вазирлар Маҳкамаси томонидан тасдиқланган Паркент, Тошкент туманлари ва Олмалиқ шаҳрини комплекс ривожлантириш бўйича 2018 йилда амалга оширилиши лозим бўлган 287 та тадбир асосан вазирлик ва идораларнинг сусткашлиги оқибатида ижро этилмаган.Албатта, вилоят ҳокимининг ҳисоботини эшитиш жараёнида бу каби масалалар батафсил муҳокама қилинади», — дейди Сенат раиси.
Маълумот учун, бугун, Сенат ялпи мажлиси давомида Тошкент вилояти ҳокимининг ҳисоботи тингланади.
Изоҳ (0)