Тошкент шаҳар Ички ишлар Бош бошқармаси Юнусобод туманидаги 23-меҳрибонлик уйи тарбияланувчиси 15 ёшли Р.С.га тан жароҳатлари етказилгани ҳақида хабар берганилди. Бош прокуратура ушбу ҳолат юзасидан жиноят иши очилгани тўғрисида «Дарё»га маълум қилди.
Меҳрибонлик уйи тарбияланувчиси 2003 йил туғилган Р.С.дан мутахассислар иштирокида тушунтириш хати олинганда, Н.Т. исмли муассаса тарбиячиси уни жорий йилнинг 19 январь куни сабабсиз хонасига чақириб оёқ қисмига пол ювиш учун мўлжалланган ёғоч швабра билан урганини маълум қилган.
Р.С. ушбу қийноқларга чидамасдан меҳрибонлик уйидан қочиб кетгани (3- ва 6 февраль кунлари) сабабли тарбиячи бу сафар уни муассаса омборхонасига олиб кириб, қўл оёқларини боғлаб урган, омборхонада уч кун мобайнида сақлаган.
Суд-тиббиёт экспертизасининг 29 мартдаги 1221-сонли хулосасида Р.С.да аниқланган тан жароҳатлари қаттиқ ўтмас жисм таъсирида етказилган бўлиб, оғирлик даражаси бўйича соғлиқни қисқа муддатга бузилишига олиб келмайдиган енгил тан жароҳати деб баҳоланган.
Мазкур ҳолат юзасидан 30 март куни Тошкент шаҳар прокуратураси томонидан Жиноят кодексининг 110-моддаси 2-қисми «а» банди билан жиноят иши қўзғатилиб, 7 апрель куни кейинги тергов ҳаракатларини давом эттириш учун Юнусобод тумани ИИО ФМБ ҳузуридаги тергов бўлимига юборилган.
Жиноят иши Юнусобод тумани ИИО ФМБ ҳузуридаги Тергов бўлими бўлинма бошлиғи майор Ф.Абдуллабеков томонидан ўз иш юритувига олиниб тергов ҳаракатларига киришилган.
Жиноят иши юзасидан С.Б., Д.Ф., Н.З., Н.Ш., Р.Г., Ш.Т. гувоҳ тариқасида сўроқ қилинган. Жиноят иши бўйича Н.Т. ҳимоячи иштирокида гумон қилинувчи тариқасида сўроқ қилинган.
Мазкур жиноят иши 20 апрель куни Тошкент шаҳар прокуратураси томонидан назорат тартибида ўрганиб чиқилиб, ёзма кўрсатма билан туман ИИО ФМБга ўтказилган.
Ҳозирда дастлабки тергов ҳаракатлари олиб борилмоқда.
Изоҳ (0)