Ўзбекистондан Қозоғистонга яна тўртта йўналиш бўйича автобус қатнови йўлга қўйилди

«Uzavtotrans Service» МЧЖ корхонаси бугундан эътиборан Қозоғистоннинг 4 та шаҳрига мунтазам қатновларни амалга оширишни бошлади. Бу ҳақда «Халқ сўзи» хабар берди.

Тошкент — Туркистон, Тошкент — Олмаота, Тошкент — Ушкунур, Чирчиқ — Ушкунур йўналишлари шулар жумласидандир. Қатновлар барча қулайликларга эга замонавий YUTONG автобусларида амалга оширилади. Чипталарни Тошкент автовокзали кассаларидан харид қилиш мумкин.

Тошкент — Туркистон йўналиши чипта нархи 50 000 сўм, Тошкент — Олмаота йўналиши чипта нархи 101 000 сўм, Тошкент — Ушкунур йўналиши чипта нархи 101 000 сўм, Чирчиқ—Ушкунур йўналиши чипта нархи эса 90 000 сўм қилиб белгиланган.

Шунингдек, корхона томонидан яқин орада «Тошкент — Нур-Султон (Қозоғистон)», «Тошкент — Тараз (Қозоғистон)», «Тошкент — Қизилўрда (Қозоғистон)», «Самарқанд — Туркистон (Қозоғистон)», «Самарқанд — Душанбе (Тожикистон)», «Тошкент — Қозон (Россия Федерацияси)»,«Тошкент — Уфа (Россия Федерацияси)», «Тошкент — Омск (Россия Федерацияси)», «Тошкент — Петропавловск (Россия Федерацияси)» йўналишларида ҳам мунтазам қатновларни йўлга қўйиш режалаштирилган.

Келажакда Хитой, Туркманистон, Россия ҳамда Қирғизистоннинг шаҳарларига Ўзбекистоннинг турли вилоятларидан йўналишларни ташкиллаштириш режалаштирилган.