Пастдарғом туман ҳокимлигининг муҳташам биноси кириш дарвозаси замонавий қулф билан ёпиб қўйилган. Бу ҳақда «Халқ сўзи» мухбири Умид Сориев хабар бермоқда.
«Туман ҳокими қабулхонаси» деган кўрсаткич белгига кўзимиз тушиб қолди. Чор-атрофи қарийб 4-5 метр келадиган панжаралар бўйлаб, махсус турникетли хонага яқинлашдик. Тўрт-беш аёл ҳамда ёш гўдакларнинг ғамгин нигоҳи эътиборни тортди.
— Ҳа, опалар, нима муаммоларингиз бор? — дедим атрофга кўз ташлаб. Жавоб бўлмагач, хонага кирдим. Икки нафар ички ишлар ходими турникет олдида йўлимни тўсди.
— Ҳужжатингиз. Нима масалада келдингиз?
— Мухбирман. Туман хокимлиги расмийлари билан учрашишим керак. Бир-икки масалаларда саволларим бор.
— Айнан ким? Ҳоким бўлса, у киши йўқ!
— Мана ҳужжатим. Дафтарингизга қайд қилинг ва мени ичкарига киритинг!
— Ҳозир, бир мутахассис олдингизга тушади.
Ҳайрон қолдим, ҳатто вилоят ҳокимлиги биносига ҳам ҳужжатингизни кўрсатиб, бемалол кираверасиз. Ташқаридаги аёлларга юзландим.
— Опалар, мен мухбирман. Балки, сизларга ёрдамим тегиб қолар.
— Бизнинг дардимиз оғир, — дейди шу туманнинг Гўзалкент маҳалласидаги 4-уйда истиқомат қилувчи Зулхумор Чўлиева ва Шаҳло Шодиева.
— Туман ҳокими яшаётган уйимизни «аварийний» дея, бизни кўчага ҳайдаяпти. Имкони борлар чиқиб кетди. 20 та хўжалик яшайди. «Қаерда яшайлик» десак, «Билмайман, квартирада туринглар» деяпти. Биз мана бу гўдакларимиз билан зорланиб қаерга борамиз. Квартирага пулни қаердан топамиз. Ўзим касалман, турмуш ўртоғим Хуршид Бозоров мардикорчилик билан шуғулланади, — дея қўшимча қилади Зулхумор Чўлиева.
«Фуқаролар қабулхонаси». Ичкарида Мазмуна Маркаева исмли мутахассис.
— Сиз фуқаролар кириб-чиқишини назорат қиларкансиз, шундайми?
— Шундай, бу тартибни ҳокимимиз жорий қилган. Биз оддий ижрочимиз холос.
Мақола сарлавҳасини Пастдарғом туман ҳокимлиги ташкилий назорат гуруҳи раҳбари Обид Облақулов топиб берди. Унга кўра, ҳокимлик «режимний объект» экан...
Изоҳ (0)