ОИТС юқтириш ва одам савдосида айбланиб, қамалган аёл Олий суд томонидан озод этилди

Олий суд жиноят ишлари бўйича судлов ҳайъати бошқа шахсга ОИВ касаллиги/ОИТСни юқтириш ва одам савдоси жиноятларини содир қилгани учун озодликдан маҳрум этилган аёлнинг иши қайта кўриб чиқилиб, у суд залидан озод этилди. Бу ҳақда «Дарё» мухбири хабар бермоқда.

46 ёшли Х.Г. жиноят ишлари бўйича Яшнобод туман судининг 2016 йил 4 апрелдаги ҳукми билан Жиноят кодексининг 113-моддаси 4-қисми (била туриб, бошқа шахсни ОИВ касаллиги/ОИТСни юқтириш хавфи остида қолдириш ёки унга ОИВ касаллиги/ОИТСни юқтириш) ва 135-моддаси 3-қисми «г» банди (уюшган гуруҳ томонидан ёки унинг манфаатларини кўзлаб содир этилган одам савдоси) билан айбли деб топилиб, қисман қўшиш йўли билан етти ярим йилга озодликдан маҳрум қилинган эди.

Олий суд жиноят ишлари бўйича судлов ҳайъатининг 2019 йил 19 апрель куни бўлиб ўтган очиқ суд мажлисида жиноят иши материаллари, Х.Г. аризасида келтирилган важлар ўрганиб чиқилди. Унинг аёллиги, айни пайтда соғлиғнинг яхши ҳолатда эмаслиги, жазони ижро этиш муассасаси томонидан ижобий тавсифланганлиги, қилмишининг ижтимоий хавфлилик даражасини жиддий камайтирувчи ҳолатлар сифатида баҳоланди. Бундан ташқари, Х.Г.нинг оилавий аҳволи, икки нафар фарзанди борлиги инобатга олинди.

Шу муносабат билан, Олий суд жиноят ишлари бўйича судлов ҳайъатининг ҳукми билан, тайинланган жазонинг ўталмай қолган муддати Сенатнинг 2016 йил 12 октябрдаги «Ўзбекистон Республикаси Конституцияси қабул қилинганлигининг 24 йиллиги муносабати билан амнистия тўғрисида»ги қарорига мувофиқ, учдан бир қисмига қисқартирилиб, Х.Г. суд залидан озод қилинди.