Авторақамларни онлайн аукцион орқали сотиш ўсди
8 апрелдан 14 апрелгача бўлган давр мобайнида онлайн аукцион орқали 869 та автомобиль рақамлари сотилди, деб хабар берди Spot.
Қайд этилишича, сотилган давлат рақам белгиларининг умумий суммаси 3,8 миллиард сўмдан ортиқни ташкил этган.
Рақобатли савдолар натижасида битимларнинг қарийб 19 фоизи биринчи тоифадаги авторақамларга, 49 фоизи иккинчи ва 32 фоизи учинчи тоифа авторақамларга тегишли.
Сотиб олувчилар орасида етакчиликни Тошкент шаҳри ва Тошкент вилояти авто ҳаваскорлари эгаллаган бўлиб, уларнинг тузилган битимлар сонидаги улуши 25 фоизга тенг. Иккинчи ўринда 18 фоиз улуш билан Андижон вилоятининг авто ҳаваскорлари, 9 фоиз билан Самарқанд вилоятининг авто ҳаваскорларига жойлашган.
Қолган ҳудудларнинг улуши 48 фоизга тенг.
Аввалроқ «Кўзгусимон авторақамлар»ни 1 млн сўм бошланғич нарх билан аукционга қўйиш таклиф қилингани ҳақида хабар берган эдик.
