«Ювентус» аргентиналик ҳужумчи Пауло Дибалани сотиб юборишга тайёр. Клуб раҳбарияти ундан тушган маблағга «Бенфика» ярим ҳимоячиси Жоау Феликсни жамоага олиб келмоқчи.
Tuttosport’нинг хабар беришича, «кекса синёра» Лиссабон клубининг 19 ёшли футболчисини сотиб олиш имкониятини кўриб чиқмоқда. Шу билан бирга, клубга мазкур трансфер учун камида 100 миллион евро керак бўлади. Италия чемпиони ушбу маблағни жорий мавсум жамоанинг асосий таркибида ўз ўрнини топа олмаган аргентиналик ўйинчини сотиб юборишдан ишлаб топмоқчи.
Маълумот учун, Пауло Дибаланинг клуб билан тузган шартномаси 2022 йилнинг ёзига қадар амал қилади. У туринликлар таркибига 2015 йилда «Палермо»дан келиб қўшилганди.
Жорий мавсум Дибала «Ювентус» сафида 37 та учрашувда майдонга тушиб, 10 та гол урди ва 6 та голга ассистентлик қилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!