Тошкент шаҳри Сергели туманида қурилган арзон уй-жойларнинг кредит тўловлари оширилгани аҳоли норозилигига сабаб бўлмоқда. Фуқароларга кўра, аввал бошқача бозор қилиб, бугун бошқа нарх айтаётган масъуллардан жавоб талаб қилишди. Бу ҳақда «Дарё» мухбири хабар бермоқда.
Маълум бўлишича, Сергели туман аҳолисига орадан ярим йил ўтиб, қурилаётган «арзон» уй-жойлар 2018 йилнинг 29 майида 1 квадрат метр нархи ўртача 3 770 000 сўм этиб белгилангани ҳақида хат жўнатилган. Хатда ҳақиқий харажатларни ҳисобланиб, яна нархлар оширилиши мумкин деган ибора қўшиб қўйилган.
Шавкат Мирзиёев 2017 йил 23 октябрда имзолаган «2017—2020 йилларда шаҳарларда арзон кўп квартирали уйларни қуриш ва реконструкция қилиш дастурини самарали амалга ошириш бўйича қўшимча чора-тадбирлари тўғрисида»ги қарорининг 1а иловасидаги дастлабки баҳосидан келиб чиқиб, уйнинг 1 квадрат метрининг нархи 2 841 170 сўм этиб белгиланганди.
«Ўзшаҳарқурилишинвест» жамияти берган маълумотга кўра, валютанинг ошиши, имтиёзли нархларда ажратилган цемент ва металл маҳсулотларини биржа савдолари орқали сотиш тартиби жорий этилганлиги ҳамда ойлик иш ҳақи миқдорлари ўртача ошганлиги, газ, электр энергиялар нархларининг кўтарилгани уй-жой нархи ўсишига таъсир қилган.
Ипотека банки ипотека кредитлари бошқармаси бошлиғи Бобур Нурмуҳаммедов уй-жойлар нархининг ўсишига иккита омилни сабаб қилиб кўрсатди. Бу кредитнинг 75 фоиздан 85 фоизга кўтарилиши ва уй-жой қийматининг ошиши билан боғлиқ. Эндиликда кредит 121 миллон сўмдан эмас 171 миллон сўмдан ҳисобланмоқда. Ўтган йилнинг 25 октябрдаги ҳисоб-китобга кўра, 2 хонали (44 кв м2) уй 125 миллонга тўғри келган бўлса, ошган нарх бўйича бу уй 156 миллионни ташкил этмоқда. Ойлик тўловлар ҳам мос равишда ўртача 709 000 минг сўмдан 1 003 000 сўмга ошган.
Бундан аввал, Олий Мажлисининг инсон ҳуқулари бўйича вакили (омбудсман) ҳамда депутат Расул Кушербоев ушбу ҳолатга муносабат билдирган эди.
Изоҳ (0)