Ўзбекистонда ҳайдовчилик гувоҳномасини алмаштириш тартиби соддалаштирилди

Ўзбекистонда ҳайдовчилар қаерда рўйхатдан ўтганидан қатъи назар 2019 йил 1 апрелдан ҳайдовчилик гувоҳномаларини Давлат хизматлари марказларида алмаштириши мумкин. Бу ҳақда Ягона интерактив давлат хизматлари портали хабар берди.

Пойтахт ИИББнинг маълум қилишича, Тошкентда жойлашган 11 та марказнинг 7 таси зарурий ускуналар билан жиҳозланган ва ушбу марказларда гувоҳномаларни алмаштириш йўлга қўйилган. Давлат божининг ҳажми ЭКИҲнинг 70 фоизи этиб белгиланган.

Мазкур давлат хизматидан фойдаланиш учун фуқаролар паспорт, эски намунадаги ҳайдовчилик гувоҳномаси ва унинг талони, шунингдек, ЭКИҲнинг 70 фоизи миқдорида тўлов амалга оширилганлигини тасдиқловчи ҳужжатларни тақдим этишлари талаб этилади.

Шунингдек, жорий йилнинг 1 апрелидан бошлаб Ягона интерактив давлат хизматлари портали орқали онлайн тартибда ҳайдовчилик гувоҳномаларини алмаштириш учун мурожаат этишлари мумкин.