Ўзбекистонда 2018 йили ҳокимларнинг 685 та қарори суд тартибида бекор қилинди. Бу ҳақда журналистлар билан ўтказилган очиқ мулоқот давомида Олий суд раиси Козим Комилов маълум қилди, дея хабар беради «Дарё» мухбири Азизбек Абдувалиев.
—Ўтган йили ҳокимларнинг 685 та қарори ҳақиқий эмас деб топилди. Ҳокимларнинг жами сонига бўладиган бўлсак, ўртача 3,4 тадан тўғри келяпти. Бу нимадан далолат беради? Уларга ҳужжатларни тайёрлаб берадиган юристларни ўқитишимиз керак. Зарур бўлса, ҳокимларнинг ўзини ҳам, — деди Козим Комилов.
Олий суд пленум залида Олий суд, Журналистлар ижодий уюшмаси қошидаги ҳуқуқий журналистика кенгаши ҳамда Журналистларни қайта тайёрлаш маркази ҳамкорлигида ўтказилган мулоқот «Судлар фаолиятида очиқлик ва ошкоралик принципини таъминлашда ОАВнинг ўрни ва роли» деб номланди. Видеоконференцалоқа тартибида бўлиб ўтган мулоқотда ҳудудлардаги журналистлар ҳам иштирок этди.
Изоҳ (0)