Нукусдаги Оролбўйи халқаро инновацион марказида Япония делегацияси вакиллари — Киото университети професcори, Сув ресурсларини ўрганиш марказининг мутахассиси Кенжи Танакани ва Тохоку университети доценти, сунъий йўлдош кузатуви бўйича мутахассис Йошия Тоге билан учрашув бўлиб ўтди. Бу ҳақда «Дарё»га Инновацион ривожланиш вазирлиги матбуот хизмати маълум қилди.
Япон делегациясини Шўрланиш шароитида биодеҳқончилик халқаро марказининг Марказий Осиё ва Кавказорти давлатлари ҳудудий ваколатхонаси раҳбари, профессор Кристина Тодерич қабул қилди.
Учрашув Оролбўйи халқаро инновацион марказининг ишлаб чиқариш майдонида бўлди. Япониялик меҳмонлар марказ кўчатхонасида етиштирилаётган туз ва қурғоқчиликка чидамли ниҳолларни кўздан кечирди.
Япониялик олимлар Кристина Тодерич иштирокида илмий-тадқиқот ишларини амалга оширишни режалаштирмоқда. Жумладан, Мўйноқ туманида гидрометеопост ташкил этиш масаласи кўриб чиқилди.
Бундан ташқари, Орол денгизининг қуриб қолган тубидаги шўр тупроқдан туз ва гербецидларни чиқариб ташлашга ёрдам берувчи технологияни яратиш ҳамда муқобил энергия ҳисобидан ишловчи иссиқхона қуриш имкониятлари муҳокама этилди.
Изоҳ (0)