Хитойлик археологлар афсонавий махлуқ тасвири туширилган тобутни топди

Хитойнинг Гуйчжоу провинциясида олиб борилган қазишмаларда Мин сулоласи (1368—1644) даврига тегишли лакланган тобут топилди, деб хабар берди «ТАСС».

Олимларнинг тахминларига кўра, топилма ёши қарийб 500 йилни ташкил этади.

Хабарда айтилишича, тобут пронвисиянинг шимоли-шарқий қисмида жойлашган Мин сулоласи учта мақбарасининг биридан топилган. Гуйчжоу маданий мерос ва археологик тадқиқотлар институти ходимларининг фикрига кўра, мақбара 1581 йилда, император Ванли ҳукумронлиги (1572—1620) даврида қурилган.

Артефактнинг юзасида қадимий Хитойнинг тўртта афсонавий махлуқлари Мовий аждар, Қизил қақнус, Қора тошбақа ва Оқ йўлбарс тасвири туширилган. Ўз навбатида мақбара деворлари бонсай ва турналар тасвирлари билан безатилган.

Шунингдек, археологлар турли қимматбаҳо буюмлар, жумладан, олтин ва кумушдан ясалган тақинчоқларни топишган. Бундан ташқари, одам суяклари ва тишлари топилган.

Археологларнинг сўзларига кўра, ушбу топилмалар Мин сулоласининг дафн маросими анъаналарини ўрганишга ёрдам беради.