Ажиниёз номидаги Нукус давлат педагогика институтида Россиянинг Сочи ва Кубан давлат университетлари билан қўшма факультетлар ташкил этилади. Бу ҳақда «Дарё»га институт матбуот хизмати маълум қилди.
Институт ректори Байрамбай Отемуратов бошчилигидаги делегацияси Кубан давлат университети ректори Михаил Астапов қабулида бўлди.
Учрашувда дефектология, педагогика ва туризм соҳаларида келгусида ҳамкорликни ривожлантириш, таълим дастурлари ва ўқув-услубий адабиётларни алмашиш, шунингдек, профессор-ўқитувчилар, илмий ходимлар ҳамда талабаларни ўзаро алмашиш бўйича ҳамкорлик масалалари муҳокама қилинди.
Шунингдек, сафар доирасида институт тарих-география факультети декани Маман Сарибаев Сочи давлат университети проректорлари билан учрашув ўтказди.
Институт делегацияси сафари якунлари бўйича Нукус давлат педагогика институтида Сочи ва Кубан университетлари билан таълим ва педагогик фанлари йўналиши бўйича қўшма факультетлар ташкил этиш бўйича келишувга эришилди.
Изоҳ (0)