Ижтимоий тармоқларда ўзбекистонлик Саиданинг Ўзбекистонга қайтаришларини сўраб қилган илтижоли видеомурожаати юзасидан ҳамон жамоатчиликнинг қизғин муҳокамаси давом этмоқда, деб ёзади Uz24.
Мурожаатда қиз бир неча кунлардан бери бир ҳаммомга қамаб қўйилгани, хўрликлар ичида яшаётганини маълум қилган. У Ўзбекистоннинг Хитойдаги элчихонаси ҳамда Ўзбекистон Республикаси Хотин-қизлар қўмитасининг саъй-ҳаракатлари билан ўз ватанига қайтарилди. Саида Uz24 нашрига бошидан ўтган оғир кунлар ҳақида сўзлаб берди.
Орзу-ҳаваслар ва пир бўлган ҳафсала...
Унга турмушга чиқишимга ҳамма қарши бўлди. Мусулмон аёлнинг ғайридин билан никоҳ қуриши мумкин эмаслиги, кейинчалик келиб чиқиши мумкин бўлган ноқулай ҳолатлар ҳақида айтишди. Лекин ўз қароримда қатъий туриб олганимдан сўнг, тақдирга тан беришди. Тўй 2018 йилнинг 4 сентябрь ойида бўлиб ўтиб, турмуш ўртоғим Хитойга 24 сентябрда кетди. Мен эса 24 октябрда Хитойга кетдим.
Тўйдан кейин Ўзбекистонда ижарада яшадик. Ижара ва бошқа ҳамма харажатларни турмуш ўртоғим ўз бўйнига олди. Аввалига, Ўзбекистонда менга яхши муомалада бўлди. Аммо Хитойга борганимдан кейин вазият мутлақо ўзгарди. Мен унинг Хитойда 50 ёшлик хотини борлигини эшитиб қолдим. Жанжал кўтарганимдан кейин унинг менга бўлган муносабати салбий томонга ўзгарди. Унинг уйида ота-онаси билан бирга яшардик. Онаси турмуш қуришимизга қаршилик қилмаган. Ўғлининг менга қилаётган муомаласини кўрарди, лекин унга қарши чиқолмасди. Чунки уйда ўғлини айтгани бўлади. Онаси ўғлидан қўрқарди. У билан беш ой бирга яшадик. Хитойда ўзимизни миллий таомлар йўқ. Шунинг учун ўзим ёқтирган картошка, тухум еб кун кечирдим. Чунки менга Хитой таомлари ёқмаган. Турмуш ўртоғим аввал ҳам Ўзбекистондан уйланган, лекин загсдан ўтмаган. Тўй ҳам биноидек ўтган. Лекин у қиз хитойга кетишни хоҳламаган.
«У мени интернетдан узоқлаштирди...»
Хитойга борганимдан кейин у мени Ўзбекистондаги яқинларим, оила аъзоларим билан гаплаштирмай қўйди. Симкартани блоклаб, вай-файларни узиб, телефонимдаги телеграм ва имо дастурларини ўчириб ташлади. Мени интернетдан узоқлаштирди. Кейин ўзимиз яшаётган уйимиз ёнидаги дўкондан вай-фай улаб олдим ва шу орқали алоқага чиқдим. Ютубга қўйган видеомурожаатим ҳақида у билмай қолди. Интернетдаги мурожаатим Озодлик сайтида чиққанидан кейин сайт ходимлари Ўзбекистонга хабар беришган. 11 февраль куни тушдан кейин яшаш жойимизга хитой милициялари келишди. Турмуш ўртоғим билан мени машинага ўтқизишди. Мен нега бундай бўлаётганини англаб турардим, билардим тез орада уйимизга келишларини. Чунки мен билан керакли одамлар алоқага чиқиб туришарди. У тушунмади қаерга кетаётганимизни. Хуллас Хитойдаги милиция идорасига бордик. У ерда бизни Ўзбекистонлик элчихонамиз ходимлари кутиб туришган экан. Улар мени Ўзбекистонга қайтариш учун турмуш ўртоғимдан розилик хати ёздириб олишди. Мен эса унга нисбатан ҳеч қандай шикоятим, даъвоим йўқлиги ҳақида ариза ёзиб бердим. Ўша куни мени меҳмонхонага жойлаштиришди. 18 февраль куни ҳамма ҳужжатларим тайёр бўлгач, 19 февраль куни Ўзбекистонга етиб келдим.
Ютубда жойлаштирилган видеомурожаат остида Саида оилавий шароитини яхшилаш учун хитойлик йигитга турмушга чиққани ҳақидаги изоҳларни ўқиш мумкин...
Йўқ, бошида менда унақа хаёл бўлмаган. Лекин видеомурожаатда шундай изоҳлар кетган. У кейинчалик менга яхши шароит қилиб беришини айтган. Мен унга ҳеч қандай шарт қўймаганман. Тўй ўтгач ҳам у менинг оиламга ҳеч қандай ёрдам бермаган. Бошида менда унга турмушга чиқишимда қўрқув бўлмаган. Чунки унинг ички дунёсини, кейинчалик унинг менга бунақа тазйиқлар ўтказиши мумкинлигини билмаганман. Ўзим хоҳлаб унга турмушга чиқиш истагида бўлганман. Кўзимга ҳеч нарса кўринмаган.
Ўзи ҳақида билдирилаётган фикрларга муносабати...
Кўпчилик бир бирингизни қандай тушуна олдингиз, ахир у хитой тилида сўзлашади-ку деган саволларни беришади. Мен хитой тилида гапирсам у тушунади. Чунки мулоқотда бўлиш учун ўзимга керакли сўзларни билиб олганман. Агар у секин гапирса, мен ҳам уни яхши тушунаман. Хитой тилини унга турмушга чиққанимдан сўнг ўрганганман.
Бу кунлар синов экан... Мана энди ҳаммаси яхши. Бора-бора ҳамма кўрган кечирганларим эсимдан чиқиб боряпти. Ижтимоий тармоқларда ўзим ҳақимдаги муҳокамаларни кўрдим. Менга нисбатан билдирилаётган фикрларнинг кўпчилиги салбий. У ерда ҳар ким ўз ички дунёси, маданиятидан келиб чиқиб фикр билдирмоқда. Шу боис тўғриси, ўқиб ўтирмадим. Қолаверса, жамиятда, атрофдагиларнинг менга нисбатан муносабати яхши. Энди қайтиб бу хатоларни такрорламайман. Ҳаётда ўз ўрнимни топиб, яхши инсон бўлишга ҳаракат қилиб, яхши яшайман деган мақсадим бор. У кечирим сўраб келса, кечирмайман. Ҳозир фарзандимиз йўқ. Лекин фарзанд бўлган тақдирда ҳам унга қайтмас эдим.
Тенгдошларига нима дейди?
Менинг бошимга тушган синовларга улар дуч келишмасин. Мен қаттиқ адашдим, улар адашмасин. Уларга айтадиган сўзим ҳаётда турмуш қуриш масаласида аввал яхшилаб ўйлаб, кейин бир қарорга келишсин. Чет элликка турмушга чиқишни ҳеч ким орзу қилмасин. Барибир Ўзбекистонимиздан қўймасин экан...
Наманган вилояти, Тўрақўрғон туман ҳокимлигининг хотин-қизлар қўмитаси бош мутахассиси Марғуба Ўринбаева:
Ўшанда Саидахонни хитойлик йигитга турмушга чиқишга чиқиш фикридан қайтаришга туман хотин-қизлар қўмитаси ва туман ФҲДЁ бўлими қаттиқ курашди. Лекин Саидахон «шу йигитга тегаман» дея туриб олгач, биз ортиқ қаршилик қила олмадик. Саидахоннинг муҳокама бўлган видеомурожаати туман хотин-қизлар қўмитаси томонидан эътиборсиз қолдирилмади. Биз дарҳол Саиданинг оиласи билан қизиқдик. 19 февраль куни Саидахон Ўзбекистоннинг Хитойдаги элчихонаси орқали қайтарилди. Ҳозирги кунда Саидахон ва унинг оиласи бизнинг назоратимизда. Онасининг саломатлиги яхши бўлмаганлиги учун, унга бепул даволаниш учун ордер олиб беряпмиз. Саидахонни ўқиган мутахассислиги бўйича иш билан таъминлаб, жамиятга фойдасига тегадиган қиз бўлишига амалий ёрдам беришга ҳаракат қиляпмиз. Қолаверса, иш билан таъминланишидан олдин психологлар ёрдамида Саиданинг руҳий зўриқишларини бартараф этиш чораларини кўряпмиз.
Республика Хотин-қизлар қўмитаси, фуқаро мурожаатлари билан ишлаш бўлими бошлиғи Озода Исломова:
Ҳозирги кунда худди Саидахоннинг тақдирига ўхшаш ҳолатлар, мурожаатлар сони борган сари ортиб ормоқда. Республика хотин-қизлар қўмитасининг 1146 рақамлардан иборат ишонч телефонлари ишга тушгач, биз ҳар бир мурожаатни зудлик билан ўрганиб, баён этиладиган ҳолатлар билан танишиб чиқяпмиз. Ишонч телефонларимиз сутка давомида кечаю-кундуз ишлаб турибди. Қолаверса, муаммоларни изчил бартараф этиш учун хотин-қизларимизнинг ҳуқуқий саводини ошириш, ФҲДЁ бўлимлари ҳузурида хотин-қизлар қўмитаси маслаҳатхоналарини ташкил қилиш масаласини йўлга қўйдик. Ушбу маслаҳатхоналар қизларимизга турмушга чиқишда ва бошқа масалаларда тўлиқ керакли тушунчаларни бериб боришади. Саидахоннинг келажаги учун бефарқ эмасмиз. Унинг жамиятда ўз ўрнини топиб кетишига қўлдан келганча амалий кўмак берамиз. Шунингдек, Саидахоннинг Ўзбекистонга қайтарилишида амалий ёрдам берган ҳар бир ташкилотларга ўз миннатдорчилигимизни билдирамиз.
Изоҳ (0)