Ўзбекистон Республикаси Президентининг 2018 йил 5 июнда «Олий таълим муассасаларида таълим сифатини ошириш ва уларнинг мамлакатда амалга оширилаётган кенг қамровли ислоҳотларда фаол иштирокини таъминлаш бўйича қўшимча чора-тадбирлар тўғрисида»ги қарорига кўра 2018—2019-ўқув йилидан олий таълим муассасаларидаги 1-босқич талабалари билимини назорат қилиш ва баҳолашнинг янги тизими жорий этилди. Бу ҳақда «Zarnews.uz» хабар бермоқда.
— Баҳолаш Корея рейтинг тизими асосида амалга оширилмоқда, — дейди Самарқанд давлат университетининг талабалар билимини баҳолаш бўлими бошлиғи Шариф Аминжонов. — Янги рейтинг тизимини муваффақиятли бажариш мақсадида талабалар билимини баҳолаш бўлими ташкил этилди. Олдинги рейтинг тизимида энг паст (3 баҳо учун) балл 55 ва 70 оралиғида бўлган бўлса, эндиликда 60 баллдан 79 баллгача этиб белгиланди. Талаба 80 баллдан 89 баллгача тўпласа, «4» баҳо ва 90 баллдан юқори тўпласа, «5» баҳо олиши мумкин.
Яна бир янгилик. Эндиликда талаба имтиҳонда белгиланган фанларнинг учтасидан 60 дан паст балл тўпласа, қайта имтиҳон топширади. Фанлардан академик қарздорлиги 4 та ва ундан ортиқ бўлган талабаларга қайта имтиҳон топширишга рухсат берилмайди ва муассаса ректорининг буйруғи билан курсдан қолдирилади. Фан ўқитувчиларининг эса имтиҳон жараёнида қатнашишига рухсат берилмайди. Айни пайтда университет бўйича 83 фоиз талабалар дастлабки имтиҳонлардан ўтган бўлса, 17 фоизи қайта имтиҳон топширмоқда.
— Биринчи семестрдан шу пайтгача ўқиган билимим билан ўтиб кетаман деб ўйлагандим, — дейди Самарқанд давлат университети тарих факультети 1-босқич талабаси Шероз Неъматуллаев. — Аммо имтиҳонларда назорат ва талаб жуда қаттиқ бўлди. Қадимги дунё тарихи фанини яхши ўзлаштиролмаганим панд берди ва биринчи синовда «йиқилдим». Шу боис берилган муддатда қайта тайёрландим ва иккинчи имтиҳон синовларида иштирок этяпман.
Дарҳақиқат, белгиланган фанлардан дарс берган ўқитувчи-педагоглар якуний назорат жараёнларида иштирок этмайди. Бу ўз навбатида, талабаларнинг билимига яраша баҳоланишига имконият яратади.
Талаба имтиҳон натижаларидан қониқмаса, апелляцияга бериш имкониятига эга. Талабанинг эътирози фанлар бўйича факультетларнинг деканати қошида шакллантирилган профессор-ўқитувчилардан иборат аппеляция гуруҳи аъзолари томонидан кўриб чиқилади ва баҳоланади.
— Бу тизим талабанинг қай даражада билимга эга эканини кўрсатмоқда, — дейди СамДУ филология факультети ўқитувчиси Ш.Маҳмадиев. — Бугун талабаларнинг ўзбек тили фанидан ёзган назорат ишини кафедрамизнинг яна бир ўқитувчиси билан текширяпмиз. Бу фанни биз эмас, кафедранинг бошқа ўқитувчиси ўтган. Текширилаётган ишлар штрихланган ва улар қайси гуруҳ талабалариники эканини ҳам билмаймиз. Агар имтиҳонлар шу тизим асосида ўтадиган бўлса, албатта, ўқишни битирган талаба билимли кадр бўлиб етишади. Биргина мисол, биз биринчи назоратда текшириб, қониқарсиз деб баҳолаган ишларнинг кейинги синовларда илмий ва ғоявий бойиганини кўряпмиз. Бу эса дастлабки имтиҳондан йиқилган талаба ҳар хил қинғирликлардан кўра ўқиб, изланиб баҳо олишга интилаётганини билдиради.
Изоҳ (0)