Венесуэлалик депутат Марказий банкнинг Россия самолётида 20 тонна олтин олиб чиқиш режаси ҳақида билиб қолди

Россиянинг Boeing 777 самолёти 28 январь куни Каракасга мамлакат марказий банк заҳирасидан 20 тонна олтин олиб чиқиш мақсадида қўнган, дея хабар беради «Ведомости».

Венесуэла миллий ассамблеяси депутати Хосе Герра ўзининг Twitter’даги саҳифасида бу ҳақда маълум қилар экан, сўзларига аниқ далил келтирмади, бироқ у ўтмишда марказий банкда иқтисодчи бўлиб ишлагани ва у ердаги собиқ ҳамкасблари билан мулоқотни давом эттираётганини қайд этган.

Тахминларга кўра, Марказий банк 840 миллион АҚШ долларлик 20 тонна олтин олиб чиқмоқчи. Бу Венесуэла олтин захирасининг бешдан бир қисмидир.

Nordwind Airlines авиаташувчисининг Boeing 777 самолёти Москвадан Каракасга учгани ҳақида «Новая газета» нашри хабар берган.

Нашрга кўра, самолётда йўловчилар бўлмаган. FlightRadar24 маълумотларига кўра, худди шу куни самолёт Каракас халқаро аэропортига қўнган.Nordwind вакили парвознинг мақсадини айтишдан бош тортган. Венесуэла молия вазири Симон Серпа олтин ҳақида изоҳ бермади ва аэропортда ҳеч қандай Россия самолёти йўқлигини маълум қилган.

Россия президенти матбуот котиби Дмитрий Песков, Кремль Нордwinд самолёти ҳақида ҳеч нарса билмаслигини айтган.

Буни Россия Ташқи ишлар вазирлиги расмий вакили Мария Захарова ҳам тасдиқлаган. У, шунингдек, ҳукумат Венесуэладан русларни эвакуация қилишни режалаштирмаётганини ҳам қўшимча қилган.